বোকাখাতত গাহৰিৰ আস্বভাৱিক মৃত্যু! : কাজিৰঙা ৰাষ্ট্ৰীয় উদ্যানলৈ ভয়ংকৰ ভাবুকি; জীপালৰ প্ৰতিক্ৰিয়া

কৃষি আৰু পশুপালন মন্ত্ৰী অতুল বৰাৰ সমষ্টি বোকাখাতত অচিন ৰোগত মৃত্যু হৈ শতাধিক গাহৰিৰ মৃত্যু হৈছে৷

ইফালে বানপানীত মহকুমাটোৰ বেছিভাগ অঞ্চলেই জলমগ্ন হৈ থকাৰ বাবে মৃত গাহৰিবোৰ পুতিবৰ বাবে ঠাই নেপাই পানীতেই উটুৱাই দিব লগা হৈছে৷ যাৰ বাবে প্ৰদুষিত হৈ পৰিছে জলমগ্ন অঞ্চলবোৰ৷ বিশেষকৈ নদীপৰীয়া অঞ্চলবোৰত এতিয়া এক অস্বাস্থ্যকৰ অৱস্থাৰ সৃষ্টি হৈছে৷

মৃত গাহৰিৰ শৰীৰৰ নমুনা সংগ্ৰহ কৰি গৱেষণাগাৰলৈ প্ৰেৰণ কৰিছে বোকাখাত মহকুমাৰ পশুচিকিৎসা বিভাগে৷ শ্বোৱাইন ফিভাৰতেই গাহৰিৰ মৃত্যু হোৱা বুলি সন্দেহ কৰিছে সকলোয়ে৷ যাৰ বাবে পৰিস্থিতি অধিক জটিল হোৱাৰো আশংকা আছে৷

বোকাখাত নদীপৰীয়া অঞ্চলত মৃত্যু হোৱা গাহৰিবোৰ নদীৰ বাঢ়নি পানী উটুৱাই দিয়াৰ বাবে কাজিৰঙা ৰাষ্ট্ৰীয় উদ্যানৰ বনৰীয়া গাহৰিবোৰো এই ৰোগত আক্ৰান্ত হোৱাৰ সম্ভাৱনা প্ৰকট হৈ পৰিছে৷

এনে পটভুমিত জীপাল নামৰ কৃষক শ্ৰমিকৰ সংগঠনটোৰ সম্পাদক প্ৰবীণ পেগু আৰু জিলা সমন্বয়ক মনিকংকনা বৰবৰাই দিয়া এক বিবৃতিত কৃষিমন্ত্ৰী অতুল বৰাৰ গৃহ সমষ্টিত শ শ গাহৰিৰ আফ্ৰিকান শ্বোৱাইন ফিভাৰত মৃত্যু হোৱাত তৎকালেই গাহৰি পালকক উচিত ক্ষতিপূৰণ দিয়াৰ দাবী কৰিছে৷

জীপালৰ মতে পশুচিকিৎসা বিভাগে আজি পৰ্যন্ত আফ্ৰিকান শ্বোৱাইন ফিভাৰ সন্দৰ্ভত কোনো ধৰণৰ সজাগতাৰ ব্যৱস্থা নকৰিলে৷

ইয়াৰ উপৰিও বানপানীৰ মাজত মৃত গাহৰিক কেনেদৰে নিষ্কাশন কৰা, মৃত গাহৰি পানীত উটুৱাই দিয়াৰ ফলত হ’ব পৰা প্ৰদুষণ আৰু সংক্ৰমণৰ সম্পৰ্কত পশুচিকিৎসা বিভাগৰ হাতত কোনোধৰণৰ ব্যৱস্থাপনা নকৰা বুলিও অভিযোগ কৰিছে জীপাল নামৰ সংগঠনটোয়ে৷

কাজিৰঙা ৰাষ্ট্ৰীয় উদ্যানৰ সীমাত নিৰ্মাণ কৰা শ্বুইচ গেটৰ বাবে অগৰাতলি, ডিফলু পথাৰ, ধনশিৰিমুখকে ধৰি বিস্তৃৰ্ণ অঞ্চলত এতিয়া পানী আৱদ্ধ হৈ পৰিছে৷

এনে অৱস্থাত পানীত উটুৱাই দিয়া মৃত গাহৰিবোৰো ভয়ংকৰ প্ৰদুষণৰ সৃষ্টি কৰাৰ লগতে কাজিৰঙা ৰাষ্ট্ৰীয় উদ্যানৰ জৈৱতন্ত্ৰও প্ৰদুষিত কৰিব বুলি জীপালে মন্তব্য কৰে৷

এইবোৰ সমস্য শীঘ্ৰে সমাধানৰ বাবে কৃষি মন্ত্ৰী অতুল বৰাক দাবী জনাইছে জীপাল শ্ৰমিক কৃষক সন্থাই৷