ভূত নহয় অদ্ভুত, শৱ ‘দাহ’ৰ পিছত জীৱন্তে ঘৰলৈ উভতি আহিল যুৱক!

কি আচৰিত কাণ্ড! পৰিয়ালটোৱে যুৱকজনৰ মৃত্যু হোৱা বুলি ভাবি শেষকৃত্য সম্পূৰ্ণ কৰিলে। ইয়াৰ পিছত পুত্ৰৰ শোকত পৰিয়ালটো ভাঙি পৰে। তাৰ পিছত সংঘটিত হয় এক অবাক কৰি তোলা কাণ্ড।

শৱ দাহ কৰি সম্পূৰ্ণ হোৱাৰ পিছত যুৱকজন সোঁশৰীৰে ঘৰলৈ উভতি আহিল। উত্তৰ প্ৰদেশৰ চাহাৰনপুৰৰ চিৰাও গাঁৱত সংঘটিত হৈছে এই ঘটনা। সেই যুৱকজনৰ নাম প্ৰমোদ কুমাৰ (২৭)।

পৰিয়ালৰ সূত্ৰ অনুসৰি, প্ৰমোদ এখন ৰেষ্টুৰেণ্টত কাম কৰিবলৈ ঘৰৰ পৰা ওলাই গৈ হৰিদ্বাৰলৈ গৈছিল। তেতিয়া তেওঁ ঘৰৰ পৰা ফোনটো লৈ যোৱা নাছিল। গতিকে পৰিয়ালৰ লোকে তেওঁৰ সৈতে কোনো ধৰণৰ যোগাযোগ কৰিব পৰা নাছিল। ইয়াৰ প্ৰায় সাত দিনৰ মূৰত পৰিয়ালৰ লোকে প্ৰমোদৰ মৃত্যুৰ খবৰ পালে।

লগতে পঢ়কঃ ভাৰতৰ কূটনৈতিক জয়! কাটাৰে মুক্তি দিলে ৮ ভাৰতীয় প্ৰাক্তন নৌসেনাৰ বিষয়াক

প্ৰমোদৰ চিনাকি এজনে এটা মৃতদেহৰ ছবি দেখুৱাই পৰিয়ালৰ আগত সেইটো প্ৰমোদৰ বুলি দাবী কৰে। পৰিয়ালৰ লোকেও মৃতদেহটো প্ৰমোদৰ সৈতে বহুত মিল আছে বুলি কথাটো বিশ্বাস কৰিছিল।

তাৰ পিছত তেওঁলোক মুজাফ্ফৰনগৰৰ এটা মৰ্গলৈ যায়। তাতেই তেওঁলোকে মৃতদেহটো চিনাক্ত কৰে। ইয়াৰ পিছত প্ৰমোদৰ পৰিয়ালে সম্পূৰ্ণ ৰীতি-নীতিৰে  শেষকৃত্য সম্পন্ন কৰিলে।

তাৰ পিছতে ঘটিল অবাক কৰি তোলা কাণ্ডটো। প্ৰমোদ হঠাতে ঘৰলৈ উভতি আহিল। তেওঁক দেখি আত্মীয়-স্বজনৰ লগে স্থানীয় গাঁৱৰ মানুহৰ চকু কপালত উঠিল। তেওঁলোকে ভুত দেখা নাইতো!

লগতে পঢ়কঃ গুৱাহাটীৰ পাৰ্ল্লাৰত দেহ ব্যৱসায় , আৰক্ষীৰ অভিযানত উদ্ধাৰ কেইবাগৰাকীও মহিলা

ঘৰলৈ উভতি অহাৰ পিছত প্ৰমোদে কয়, “ঘৰলৈ উভতি আহি দেখোঁ মোৰ ছবিখনত মালা পিন্ধাই থোৱা হৈছে। মই সম্পূৰ্ণ স্তম্ভিত হৈ পৰিলোঁ। মই ঘৰলৈ উভতি অহাৰ কথা শুনি গাঁৱৰ মানুহে মোক চাবলৈ আহিছে।”