UPIৰ নতুন নিয়ম: বৃদ্ধি হ’ল ধন পৰিশোধৰ সীমা, ব্যৱহাৰকাৰীৰ বাবে নতুন সুবিধা

আজিৰ পৰা ১৫ ছেপ্টেম্বৰ UPI ব্যৱহাৰকাৰীৰ বাবে নতুন নিয়ম কার্যকৰ হ’ল। ইণ্ডিয়ান নেচনেল পেমেণ্টছ কৰ্প’ৰেশ্যন (NPCI)-এ ঘোষণা কৰা নিয়ম অনুসাৰে এতিয়া ধন পৰিশোধৰ সীমা ব্যাপকভাৱে বৃদ্ধি কৰা হৈছে। আগতে দৈনিক ২ লাখ টকা পৰ্যন্ত পেমেণ্ট কৰিব পৰা গৈছিল, যদিও এতিয়া কিছুমান ক্ষেত্ৰত এই সীমা ১০ লাখ টকালৈ উন্নীত কৰা হৈছে।

P2M আৰু P2P লেনদেনৰ নতুন সীমা

নতুন নিয়ম অনুসাৰে ব্যক্তিৰ পৰা ব্যৱসায়ীলৈ (Person to Merchant–P2M) কৰা লেনদেনৰ সীমা বৃদ্ধি কৰা হৈছে। এতিয়া ব্যৱসায়ীক এদিনত ১০ লাখ টকা পৰ্যন্ত UPIৰ জৰিয়তে পৰিশোধ কৰিব পাৰিব। পূৰ্বে এই সীমা আছিল ২ লাখ টকা। তবে ব্যক্তিৰ পৰা ব্যক্তিলৈ (Person to Person–P2P) কৰা ধন প্ৰেৰণৰ সীমা আগৰ দৰে ১ লাখ টকা অৱশিষ্ট থাকিব।

নতুন সীমা কোন কোন ক্ষেত্ৰত বৃদ্ধি হ’ল?

গহনা ক্ৰয়ঃ এতিয়া প্ৰতিটো লেনদেনত ২ লাখ টকা আৰু দৈনিক ৬ লাখ টকা পৰ্যন্ত গহনা ক্ৰয় কৰিব পাৰিব (আগতে সীমা আছিল ১ লাখ টকা)।

ভ্ৰমণ বুকিংঃ ভ্ৰমণ সম্পৰ্কীয় বুকিঙৰ ক্ষেত্ৰত এখনত ৫ লাখ টকা আৰু ২৪ ঘণ্টাত ১০ লাখ টকা পৰ্যন্ত লেনদেন কৰিব পাৰিব।

ঋণ পৰিশোধঃ ঋণ পৰিশোধৰ বাবে প্ৰতিটো লেনদেনত ৫ লাখ টকা আৰু দৈনিক ১০ লাখ টকা পৰিশোধ কৰিব পাৰিব।

কেপিটেল মাৰ্কেটঃ ষ্টক মাৰ্কেট আৰু মিউচুৱেল ফাণ্ডত বিনিয়োগৰ বাবে এতিয়া একেলগে ৫ লাখ টকা আৰু ২৪ ঘণ্টাত ১০ লাখ টকা পৰ্যন্ত লেনদেন কৰিব পাৰিব।

ক্ৰেডিট কাৰ্ড বিলঃ ক্ৰেডিট কাৰ্ড বিল পৰিশোধৰ সীমা প্ৰতিটো লেনদেনত ৫ লাখ টকা আৰু দৈনিক ৬ লাখ টকালৈ বৃদ্ধি কৰা হৈছে (পূৰ্বে সীমা আছিল ২ লাখ টকা)।

বীমাঃ বীমা প্ৰিমিয়াম পৰিশোধৰ ক্ষেত্ৰত প্ৰতিটো লেনদেনত ৫ লাখ টকা আৰু দৈনিক ১০ লাখ টকা পৰ্যন্ত সীমা থাকিব।

ডিজিটেল একাউণ্ট খোলাঃ নতুন ডিজিটেল একাউণ্ট খোলাৰ সময়ত প্ৰাৰম্ভিক জমা ৫ লাখ টকা পৰ্যন্ত কৰিব পাৰিব।

সাধাৰণ ব্যৱহাৰকাৰীৰ ওপৰত প্ৰভাৱ

এই নতুন নিয়মৰ ফলত ব্যৱহাৰকাৰীয়ে বৃহৎ পৰিমাণৰ লেনদেন সহজে আৰু কোনো সীমাবদ্ধতা নোহোৱাকৈ কৰিব পাৰিব। গহনা ক্ৰয়, ভ্ৰমণ, ঋণ, বিনিয়োগ আদি ক্ষেত্ৰত ই বিশেষ সুবিধা প্ৰদান কৰিব বুলি আশা প্ৰকাশ কৰিছে বিশেষজ্ঞসকলে।