UPSC 2026: অসামৰিক সেৱাৰ অধিসূচনাত এলানি পৰিৱৰ্তন, সেইবোৰ কি কি?

কেন্দ্রীয় লোকসেৱা আয়োগে ২০২৬ চনৰ দেশৰ সন্মানীয় প্রশাসনিক পৰীক্ষা ‘অসামৰিক সেৱা’ চমুকৈ চি এছ ই-ৰ অধিসূচনা প্রকাশ কৰিছে ৷ ৪ ফেব্ৰুৱাৰীৰ পৰা আৰম্ভ হোৱা আবেদন প্ৰক্ৰিয়া ২৪ ফেব্ৰুৱাৰীৰ সন্ধিয়া ৬ বজালৈকে চলিব।

এইবাৰ আই এ এছ, আই পি এছ, আই এফ এছকে ধৰি বিভিন্ন কেডাৰত মুঠ ৯৩৩টা খালী পদ পূৰণ কৰিব। অৱশ্যে এই অধিসূচনাত আয়োগে প্ৰাৰ্থীসকলৰ সুৰক্ষাৰ বাবে আৰু প্ৰৱঞ্চনা ৰোধৰ বাবে এলানি আধুনিক আৰু কঠোৰ নিয়মৰ  সংযোজন কৰিছে।

শেহতীয়াকৈ বিভিন্ন প্ৰতিযোগিতামূলক পৰীক্ষাত উত্থাপিত হোৱা ‘পৰিচয় চুৰি’ বা ছদ্মবেশৰ অভিযোগ ৰোধ কৰিবলৈ এতিয়া কৃত্ৰিম বুদ্ধিমত্তা বা এআইৰ সহায় লৈছে ইউ পি এছ চিয়ে। আয়োগে অৱগত কৰিছে যে প্ৰতিজন পৰীক্ষাৰ্থীয়ে পৰীক্ষা কেন্দ্ৰত ‘ফেচ অথেণ্টিকেচন’ বা ফেচিয়েল ভেৰিফিকেচনৰ মাজেৰে যাব লাগিব। পৰীক্ষা কেন্দ্ৰত উপস্থিত থকা পৰীক্ষাৰ্থীৰ মুখখন আবেদন প্ৰ-পত্ৰৰ ফটোৰ সৈতে মিল থাকিলেহে প্ৰৱেশৰ অনুমতি দিয়া হ’ব। ইয়াৰ সমান্তৰালকৈ আধাৰ সম্পৰ্কীয় পৰীক্ষণ প্ৰক্ৰিয়াও বাধ্যতামূলক কৰা হৈছে।

ইতিমধ্যে অসামৰিক সেৱাত নিয়োজিত হোৱাসকলৰ বাবে এই নিয়ম কঠোৰ হৈ পৰিছে। নতুন নিয়ম অনুসৰি যদি কোনো পৰীক্ষাৰ্থীয়ে ইতিমধ্যে আই পি এছ হিচাপে কাম কৰি আছে, তেন্তে ২০২৬ চনৰ পৰীক্ষাত সফল হ’লেও তেওঁ পুনৰ আই পি এছ কেডাৰৰ বাবে আবেদন কৰিব নোৱাৰিব। যিসকলে আই এ এছ বা আই এফ এছ হিচাপে কাম কৰি আছে তেওঁলোকে এইবাৰ পৰীক্ষাত বহিব নোৱাৰিব। আনহাতে, গ্ৰুপ-এ সেৱাৰ পৰীক্ষাৰ্থীয়ে যথাযথভাৱে প্ৰশিক্ষণৰ পৰা ৰেহাই পালেহে পুনৰ পৰীক্ষাত অৱতীৰ্ণ হোৱাৰ সুযোগ পাব।

ইপিনে, এই বছৰৰ পৰা কেডাৰ বিতৰণত নতুন ‘৪-গ্ৰুপ ব্যৱস্থা’ প্ৰৱৰ্তন কৰা হৈছে। ফলত পছন্দৰ ৰাজ্য বা ‘হোম কেডাৰ’ পোৱাৰ সম্ভাৱনা আগতকৈ অলপ জটিল হ’ব পাৰে।

আয়োগে জনাইছে যে অসামৰিক সেৱাৰ প্ৰাৰম্ভিক পৰীক্ষা অহা ২৪ মে’, ২০২৬ তাৰিখে অনুষ্ঠিত হ’ব। সফল পৰীক্ষাৰ্থীৰ মূল পৰীক্ষা ২১ আগষ্টৰ পৰা আৰম্ভ হ’ব। আবেদনকাৰীৰ বয়স ২১ৰ পৰা ৩২ বছৰৰ ভিতৰত হ’ব লাগিব (অনুসূচিত জাতি, অনুসূচিত জনজাতি আৰু অ’বিচিৰ ক্ষেত্ৰত বয়সৰ ৰেহাই প্ৰযোজ্য)। নূন্যতম অৰ্হতা হ’ল যিকোনো স্বীকৃতিপ্ৰাপ্ত বিশ্ববিদ্যালয়ৰ পৰা স্নাতক ডিগ্ৰী।

পেছাদাৰী মহলৰ মতে আয়োগৰ মূল লক্ষ্য হৈছে অ’টিআৰ ব্যৱস্থাক আধুনিকীকৰণ আৰু ডিজিটেল পৰ্টেলৰ জৰিয়তে স্বচ্ছতা অনা। প্ৰাৰ্থীসকলক নিৰ্ধাৰিত তাৰিখৰ কমেও কেইদিনমান আগতে আবেদন প্ৰক্ৰিয়া সম্পূৰ্ণ কৰিবলৈ পৰামৰ্শ দিয়া হৈছে যাতে শেষ মুহূৰ্তত জটিলতা আহি নপৰে।