চীনৰ সাহায্যত পাকিস্তানে আধুনিকীকৰণ কৰিছে পাৰমাণৱিক অস্ত্ৰ; আমেৰিকাৰ চোৰাংচোৱাৰ প্ৰতিবেদনত চাঞ্চল্যকৰ তথ্য

চীনৰ সামৰিক আৰু অৰ্থনৈতিক সাহায্যৰে পাকিস্তানে নিজৰ পাৰমাণৱিক অস্ত্ৰ আধুনিকীকৰণ কৰিছে। এই তথ্য দেওবাৰে আমেৰিকাৰ প্ৰতিৰক্ষা চোৰাংচোৱা সংস্থাই প্ৰকাশ কৰা শেহতীয়া ৱৰ্ল্ড থ্ৰেট এছেছমেন্ট (বিশ্ব ভাবুকি মূল্যায়ন) প্ৰতিবেদনত পোৱা গৈছে। পাকিস্তানে ভাৰতক ভয় খুৱাবলৈ এই পদক্ষেপ লোৱাৰ প্ৰয়াস বুলি ধাৰণা কৰা হৈছে।

প্ৰতিবেদনত উল্লেখ কৰা হৈছে যে আগন্তুক বছৰৰ বাবে পাকিস্তানী সেনাবাহিনীৰ শীৰ্ষ অগ্ৰাধিকাৰসমূহৰ ভিতৰত আঞ্চলিক প্ৰতিবেশী দেশসমূহৰ সৈতে সীমান্ত সংঘৰ্ষ আৰু পাৰমাণৱিক অস্ত্ৰৰ আধুনিকীকৰণ অব্যাহত ৰখাটো অন্যতম।

ৱৰ্ল্ড থ্ৰেট এছেছমেন্ট প্ৰতিবেদন অনুসৰি, “পাকিস্তানে নিজৰ পাৰমাণৱিক অস্ত্ৰ আধুনিকীকৰণ কৰি আছে আৰু পাৰমাণৱিক সামগ্ৰী, পাৰমাণৱিক কমাণ্ড আৰু নিয়ন্ত্ৰণৰ নিৰাপত্তা বজাই ৰাখিছে। পাকিস্তানে প্ৰায় নিশ্চিতভাৱে বিদেশী যোগানকাৰী আৰু মধ্যস্থতাকাৰীৰ পৰা গণধ্বংসী অস্ত্ৰ ক্ৰয় কৰে।”

প্ৰতিবেদনত লগতে উল্লেখ কৰা হৈছে যে পাকিস্তানে চীনৰ পৰা গণধ্বংসী অস্ত্ৰ (WMD) নিৰ্মাণৰ বাবে সামগ্ৰী আৰু প্ৰযুক্তি লাভ কৰি আছে, ইয়াৰে কিছুমান হংকং, ছিংগাপুৰ, তুৰস্ক আৰু সংযুক্ত আৰব আমিৰশ্বাহীৰ দৰে দেশৰ জৰিয়তে হস্তান্তৰ কৰা হয়।

যদিও চীন পাকিস্তানৰ সামৰিক সঁজুলিৰ প্ৰধান যোগানকাৰী, পাকিস্তানত কৰ্মৰত চীনা নাগৰিকক লক্ষ্য কৰি সংঘটিত কৰা ধাৰাবাহিক সন্ত্ৰাসবাদী আক্ৰমণৰ বাবে বেইজিঙৰ ইছলামবাদৰ প্ৰতি মোহভংগ বাঢ়িছে। সম্পৰ্ক তিক্ত হৈ পৰিছে।

ৱৰ্ল্ড থ্ৰেট এছেছমেন্ট প্ৰতিবেদনত কোৱা হৈছে যে “পাকিস্তানে ভাৰতক তেওঁলোকৰ অস্তিত্বৰ ভাবুকি হিচাপে লয়। ভাৰতৰ গতানুগতিক সামৰিক সুবিধা তুচ্চ কৰিবলৈ যুদ্ধক্ষেত্ৰৰ পাৰমাণৱিক অস্ত্ৰৰ বিকাশকে ধৰি নিজৰ সামৰিক অস্ত্ৰভাণ্ডাৰ আধুনিকীকৰণ কৰি যাব।”