‘ভেনাছ ইনচাফিচিয়েন্সি’ ৰোগত আক্ৰান্ত ৰাষ্ট্ৰপতি ট্ৰাম্প; কিমান গুৰুতৰ? জনালে হোৱাইট হাউছে

বৃহস্পতিবাৰে হোৱাইট হাউছে ঘোষণা কৰে যে আমেৰিকাৰ ৰাষ্ট্ৰপতি ড’নাল্ড ট্ৰাম্পৰ ‘ক্ৰনিক ভেনাছ ইনচাফিচিয়েন্সি’ নামৰ শিৰাৰ সমস্যা ধৰা পৰিছে। ভৰিৰ তলৰ অংশত এক প্ৰকাৰৰ ফুলা ভাৱ দেখাৰ পিছত চিকিৎসকৰ পৰামৰ্শ মতে পৰীক্ষা কৰা হয় । সেই পৰীক্ষাত চিকিৎসকে নিশ্চিত কৰে যে ট্ৰাম্পৰ শৰীৰত এই সমস্যা আছে।

ৰাষ্ট্ৰপতিগৰাকীৰ চিকিৎসকৰ এখন পত্ৰৰ উদ্ধৃতি দি হোৱাইট হাউছৰ সচিব লেভিটে এক প্ৰেছ ব্রিফিঙত কয় যে, “আল্ট্ৰাছাউণ্ডত দেখা গৈছে যে ৰাষ্ট্ৰপতি ট্ৰাম্পৰ ভৰিৰ শিৰাবোৰে স্বাভাৱিকভাৱে তেজ চলাচল কৰিব পৰা নাই। ৭০ বছৰৰ ওপৰৰ লোকৰ ক্ষেত্ৰত এইটো অতি সাধাৰণ অৱস্থা।”

অৱশ্যেই এই ৰোগক গুৰুতৰ আখ্যা দিয়া নাই চিকিৎসকে। লেভিটে কয় যে ট্ৰাম্পৰ শৰীৰত ডিপ ভেইন থ্ৰম্ব’ছিছ (ব্লাড ক্লট), কোনো ধমনী সমস্যা, হৃদযন্ত্ৰৰ বিকলতা, বৃক্কৰ সমস্যা বা আন কোনো প্ৰণালীবদ্ধ ৰোগৰ কোনো প্ৰমাণ পোৱা হোৱা নাই।

চিকিৎসকে কয়, “এই শিৰাৰ সমস্যাৰ মাজতো ৰাষ্ট্ৰপতিয়ে কোনো ধৰণৰ শাৰীৰিক অস্বস্তি অনুভৱ কৰা নাই।”

নেশ্যনেল লাইব্ৰেৰী অৱ হেল্থৰ দ্বাৰা পৰিচালিত মেডলাইনপ্লাছ ৱেবছাইটৰ মতে, “ভেনাছ ইনচাফিচিয়েন্সি’ হ’ল এনে এটা শাৰীৰিক অৱস্থা, য’ত শিৰাৰবোৰে ভৰিৰ পৰা হৃদযন্ত্ৰলৈ তেজ ঘূৰাই পঠিওৱাত সমস্যাত পৰে। সময়ৰ লগে লগে এই ৰোগ লাহে লাহে বাঢ়িব পাৰে, কিন্তু আগতীয়াকৈ চিকিৎসা আৰম্ভ কৰিলে ইয়াক নিয়ন্ত্ৰণ কৰিব পৰা যায়।”

লেভিটে লগতে জনায় যে ট্ৰাম্পৰ হাতৰ পিছপিনে কিছু ঘাঁ বা ক’লা পৰা দাগ দেখা গৈছে। অৱশ্যে সেয়াও গুৰুতৰ নহয়।

তেওঁৰ ভাষাত, “ৰাষ্ট্ৰপতিগৰাকীয়ে নিয়মিতভাৱে হাত মিলাইছে আৰু তেওঁ হৃদৰোগ প্ৰতিৰোধৰ বাবে এছপিৰিন খাইছে। ইয়াৰ বাবেই কোমল টিছ্যুবোৰত কিছু পৰিমাণে প্ৰদাহ দেখা দিয়াটো স্বাভাৱিক।”