হৰমুজ প্ৰণালীত আৰু গভীৰ সংকট; ইৰাণৰ সকলো বন্দৰ অৱৰোধ কৰি ৰাখিছে আমেৰিকাই
ইছলামবাদত শান্তি চুক্তি ব্যৰ্থ হোৱাৰ ২৪ ঘণ্টাৰ ভিতৰতে মধ্যপ্ৰাচ্যৰ সংকট গভীৰ হৈ পৰিছে। ফলত দুয়োখন দেশৰ মাজত ১৪ দিনীয়া যুদ্ধবিৰতি যিকোনো মুহূৰ্ততে ভাঙি যাব পাৰে। এতিয়া আমেৰিকাই ইৰাণৰ সকলো বন্দৰ অৱৰোধ কৰি পৰিস্থিতিৰ উত্তেজনা আৰু এখোপ বৃদ্ধি কৰিছে।
এই অৱৰোধ ১৩ এপ্ৰিল সোমবাৰে পুৱা ১০ বজাৰ পৰা আৰম্ভ হ’ব। ফলত কোনো জাহাজ ইৰাণৰ বন্দৰৰ পৰা ওলাই যাব বা প্ৰৱেশ কৰিব নোৱাৰিব। এই ঘোষণা আমেৰিকাৰ চেণ্ট্ৰেল কমাণ্ডৰ তৰফৰ পৰা কৰা হৈছে।
ছ’চিয়েল মিডিয়া পোষ্টত চেণ্ট্ৰেল কমাণ্ডে কয় যে ৰাষ্ট্ৰপতিৰ ঘোষণা অনুসৰি আমেৰিকাৰ বাহিনীয়ে ইৰাণৰ বন্দৰত প্ৰৱেশ আৰু প্ৰস্থানত জাহাজকে ধৰি সকলো ধৰণৰ যাতায়তৰ ওপৰত অৱৰোধ কাৰ্যকৰী কৰিব। কোৱা হৈছে যে এই অৱৰোধ আৰব উপসাগৰ আৰু ওমান উপসাগৰৰ ইৰাণৰ বন্দৰ আৰু উপকূলীয় অঞ্চল ব্যৱহাৰ কৰা সকলো দেশৰ জাহাজৰ বিৰুদ্ধেও প্ৰয়োগ কৰা হ’ব।
ইৰাণৰ বন্দৰ অৱৰোধৰ সমান্তৰালকৈ আমেৰিকাৰ চেণ্ট্ৰেল কমাণ্ডে ঘোষণা কৰিছে যে ইৰাণৰ বাহিৰে সকলো দেশৰ জাহাজে নিৰাপদে হৰমুজ প্ৰণালীৰ মাজেৰে পাৰ হ’ব পাৰিব। ইৰাণৰ বাহিৰে আন দেশৰ পৰা অহা জাহাজৰ চলাচলত বাধা নিদিয়ে আমেৰিকাৰ নৌসেনাই।
অৱশ্যে চেণ্ট্ৰেল কমাণ্ডে আন দেশৰ নাৱিকসকলক ওমান উপসাগৰ আৰু হৰমুজ প্ৰণালীৰ আশে-পাশে থকা অঞ্চলত চলাচল কৰাৰ সময়ত চৰকাৰী সতৰ্কবাণী বা নিৰ্দেশনাৰ প্ৰতি গুৰুত্ব দিবলৈ কয়। প্ৰয়োজন হ’লে চেনেল ১৬ত আমেৰিকাৰ নৌসেনাৰ সৈতেও যোগাযোগ কৰিব পাৰে।
দেওবাৰে ট্ৰুথ ছ’চিয়েলত এটা পোষ্টত ৰাষ্ট্ৰপতি ড’নাল্ড ট্ৰাম্পে কয় যে আমেৰিকাই অতি সোনকালে হৰমুজ প্ৰণালীৰ মাজেৰে পাৰ হোৱা জাহাজসমূহক বাধা দিবলৈ আৰম্ভ কৰিব। লগতে ‘অবৈধ টোল’ দি থকা জাহাজসমূহহে নিৰীক্ষণ কৰা হ’ব বুলিও তেওঁ কয়। তাৰ কিছু ঘন্টাৰ পাছতে আমেৰিকাৰ সেনাই কয় যে সোমবাৰে ভাৰতীয় সময় অনুসৰি সন্ধিয়া ৭:৩০ বজাৰ পৰা অৱৰোধ কাৰ্যকৰী আৰম্ভ হ’ব।
বিশেষজ্ঞসকলে জনোৱা মতে, হৰমুজৰ মাজেৰে পাৰ হৈ যোৱা কেইবাখনো জাহাজে চীনৰ ইউয়ান ব্যৱহাৰ কৰি আছে। বিষয়টো পোহৰলৈ অহাৰ লগে লগে আমেৰিকাই এই ব্যৱস্থাটোক পেট্ৰ’ডলাৰ ব্যৱস্থাৰ বাবে প্ৰত্যাহ্বান আৰু আমেৰিকাৰ নিষেধাজ্ঞাৰ পৰা হাত সাৰিবলৈ এক উপায় হিচাপে দেখিছে। ফলত ৱাশ্বিংটনে কঠোৰ স্থিতি গ্ৰহণ কৰিছে।
এই ঘোষণা আমেৰিকাই কৰিছে যদিও ইৰাণে এতিয়াও মুখ খোলা নাই। তেওঁলোকে গোটেই কথাটো মনে মনে মানি ল’বনে? নে মধ্যপ্ৰাচ্যত আকৌ এবাৰ যুদ্ধ আৰম্ভ হ’ব, সেয়া এতিয়া সময়েহে ক’ব।