গাজাত ২০০ সেনা মোতায়েন কৰিব আমেৰিকা যুক্তৰাষ্ট্ৰই; যুদ্ধবিৰতি উদযাপন গাজাবাসীৰ

যৌথ টাস্ক ফ’ৰ্চৰ অংশ হিচাপে গাজাত ২০০ সেনা মোতায়েন কৰিব আমেৰিকা যুক্তৰাষ্ট্ৰই। অৱশ্যে গাজাৰ ভিতৰত কোনো পৃথকভাৱে আমেৰিকান সেনা মোতায়েন কৰা নহয়।

গাজাৰ স্থিতিশীলতা ঘূৰাই অনাৰ বাবে এই সেনা নিয়োগ কৰা হ’ব বুলি আমেৰিকা যুক্তৰাষ্ট্ৰই প্ৰকাশ কৰিছে। বৃহস্পতিবাৰে এই তথ্য নিশ্চিত কৰিছে আমেৰিকাৰ দুগৰাকী উচ্চপদস্থ বিষয়াই।

নাম প্ৰকাশ নকৰাৰ চৰ্তত আমেৰিকাৰ উচ্চপদস্থ বিষয়া দুগৰাকীয়ে সাংবাদিকৰ আগত কয় যে এই ২০০ সেনাই হ’ব টাস্ক ফ’ৰ্চৰ মূল অংশ। তাত ইজিপ্তৰ সশস্ত্ৰ বাহিনী, কাটাৰ, তুৰস্ক আৰু সম্ভৱতঃ সংযুক্ত আৰব আমিৰশ্বাহীৰ প্ৰতিনিধিও থাকিব।

ইজিপ্তৰ পৰ্যটন চহৰ শ্বাৰ্ম এল শ্বেখত চলি থকা আলোচনাৰ তৃতীয় দিনা যোৱা বুধবাৰে হামাছ আৰু ইজৰাইলে যুদ্ধবিৰতিৰ বাবে সন্মতি প্ৰকাশ কৰে। এই ক্ষেত্ৰত আমেৰিকা, কাটাৰ, ইজিপ্ত আৰু তুৰস্কই মধ্যস্থতাকাৰী হিচাপে কাম কৰি আছে। চুক্তি অনুসৰি দুয়োপক্ষই গাজাত সংঘাত বন্ধ কৰি বন্দী বিনিময় কৰিব।

দুয়োপক্ষই যুদ্ধবিৰতিৰ বাবে সন্মতি দিয়াৰ খবৰ পাই আনন্দিত হৈ পৰিছে গাজাবাসী। ইজৰাইলেও যুদ্ধবিৰতি উদযাপন কৰি কয় যে হামাছৰ হাতত পণবন্দীসকলক মুকলি কৰি দিয়াৰ সুযোগ আহিব।

২০২৩ চনৰ ৭ অক্টোবৰৰ পৰা ইজৰাইলে গাজাত নৃশংস অভিযান চলাই আহিছে। এই সময়ছোৱাত তাত দুটা পৰ্যায়ত মাত্ৰ দুমাহৰ অলপ বেছি সময় যুদ্ধবিৰতি চলিছিল। বাকী সময়ছোৱাত ইজৰাইলে আক্ৰমণ চলাই ৬৭ হাজাৰৰো অধিক পেলেষ্টাইনীক হত্যা কৰিছে। প্ৰায় ১ লাখ ৭০ হাজাৰ লোক আহত হৈছে।