২৪ বছৰৰ পিছত ল’কডাউনে ঘৰলৈ উভতাই আনিলে ঘৰ এৰি গুচি যোৱা এজন লোকক

নিজৰ ঘৰ-পৰিয়ালক এৰি সুদীৰ্ঘ ২৪ বছৰ আঁতৰি থকা এজন লোকে ক’ৰ’না প্ৰতিৰোধৰ বাবে দেশজুৰি বলৱৎ কৰা ল’কডাউনৰ বাবে ঘৰলৈ উভতি আহিছে।

উত্তৰাখণ্ডৰ বাগেশ্বৰ জিলাৰ ৰামাদি গাঁৱৰ প্ৰকাশ সিং কাৰ্কি নামৰ ৪২ বছৰীয়া লোকজনে ২৪ বছৰ পূৰ্বে নিজ ঘৰৰ পৰা উলাই যোৱাৰ পিছত গৰে কোনো সন্ধান পোৱা নাছিল।

লোকজনে সুদীৰ্ঘ ২৪ বছৰে পৰিয়ালৰ লোকৰ সৈতে কোনোধৰণ যোগাযোগো কৰা নাছিল।

যোৱা ১৮ এপ্ৰিলত গুজৰাটৰ পৰা উভতি নিজ গাঁৱত উপস্থিত হোৱা লোকজনক গাঁৱৰ মানুহে চিনি পোৱা নাছিল।

লোকজনে নিজৰ মাতৃ আৰু ভাতৃ দুজনৰ নাম কোৱাতহে গাঁৱৰ মানুহে তেওঁক নিচিবলৈ সক্ষম হয়।

ইয়াৰ লগে লগে লোকজনৰ মাতৃক তেওঁ উভতি অহাৰ খবৰ দিয়াটো দিয়া হয়।

‘আমি তেওঁক চিনি পোৱা নাছিলো, কিন্তু তেওঁ আমাক নিজৰ পৰিয়ালৰ লোকৰ নাম কৈছিল। আমি সকলোৱে আচৰিত হৈছিলো। এদিন ঘৰ এৰি যোৱা ল’ৰাটোক ল’কডাউনে ঘৰলৈ লৈ আনিলে। যেতিয়া তেওঁৰ মাতৃয়ে তেওঁক চিনি পালে তেতিয়া আমি নিশ্চিত হ’লো লোকজন প্ৰকাশ সিং কাৰ্কি হয়।’ গণেশ কুমাৰ নামৰ গঞাজনে কয়।

‘কাৰ্কিয়ে দেউতাক লগ নাপালে আৰু। কাৰণ তেওঁ ঘৰৰ পৰা আঁতৰত থাকোতেই দেউতাক ঢুকাল। তেওঁ নিজৰ জ্যেষ্ঠ আৰু কণিষ্ঠ ভাতৃৰ লগত কথা পাতিলে আৰু তেওঁলোকে তেওঁক আকোৱালি ল’লে।’ কুমাৰে কয়।

ইফালে কাৰ্কিয়ে কয় তেওঁৰ পৰিয়ালক লগ পাই সুখী।

১৯৯৫ চনত হাই স্কুল পাছ কৰাৰ পিছতে কাৰ্কিয়ে কামৰ সন্ধানত ঘৰৰ পৰা উলাই গৈছিল। ঘৰৰ পৰা উলাই যোৱাৰ পিছত তেওঁ কোনোদিন ঘৰৰ সৈতে যোগাযোগ কৰা নাছিল।

তেওঁ দিল্লী, হিমাচল প্ৰদেশৰ পৰা গুজৰাটলৈকে বিভিন্ন প্ৰতিষ্ঠানত কৰ্মত নিয়োজিত হোৱাৰ কথা জানিবলৈ দিয়ে পৰিয়ালক।

‘মই নিশ্চিত হোৱা নাছিলো যে ঘৰ উলিয়াব পাৰিম নে নাই! কিন্তু অৱশেষত মই  ঘৰ আৰু পৰিয়ালক বিচাৰি পালোহি। ২৪ বছৰ পিছত মই এওঁলোকক বিচাৰি পালো। এতিয়া মই অতি সুখী।’ কাৰ্কিয়ে কয়।

‘সি ১৯৯৫ চনতে ঘৰৰ পৰা উলাই গৈছিল। দেউতাক আৰু মই তেওঁক বহুত বিচাৰিছিলো, আমি সন্ধান পোৱা নাছিলো। কিন্তু মই আশা কৰিছিলো, ভগৱান মহান আৰু এদিন মোৰ ল’ৰাই উভতাই দিবই।’ কাৰ্কিৰ মাতৃয়ে কয়।

কাৰ্কিয়ে জানিবলৈ দিয়ে যে তেওঁ আৰু কেতিয়াও ঘৰ এৰি নাযায়।

ইতিমধ্যে কাৰ্কি স্থানীয় প্ৰাথমিক বিদ্যালয়ত ১৪ দিনৰ বাবে কোৱাৰান্টেইন কৰা হৈছে।