”ভাৰতৰ প্ৰত্যেকজন নাগৰিককে ভেকচিন প্ৰদান কৰাৰ বাদে আন একো গত্যন্তৰ নাই” : কোনে ক’লে?

ভাৰতৰ প্ৰত্যেকজন নাগৰিককে ভেকচিন প্ৰদান কৰিব লাগিব, তাৰ বাদে ক’ভিড-১৯ক প্ৰতিহত কৰিবলৈ আন একো উপায় নাই।

এই অভিমত প্ৰকাশ কৰিলে আমেৰিকা যুক্তৰাষ্ট্ৰ শীৰ্ষ চিকিৎসা বিশেষজ্ঞ তথা বিডেন প্ৰশাসনৰ প্ৰধান চিকিৎসা উপদেষ্টা এণ্টনী ফৌচিৰ।

দেওবাৰে এক আমেৰিকান সংবাদ প্ৰতিষ্ঠানৰ আগত দিয়া সাক্ষাৎকাৰত ভাৰতৰ কৰোণা ৰোগীসকলৰ বাবে চিকিৎসালয়ত বিচনা আৰু অক্সিজেনৰ নাটনিৰ সম্পৰ্কেও মন্তব্য কৰে তেওঁ।

তেওঁ কয় যে ভেকচিনৰ ক্ষেত্ৰত ভাৰতে কেৱল দেশীয় উৎপাদনৰ উপৰতে ভৰসা নকৰি বিদেশৰ পৰাও ভেকচিন আমদানি কৰাৰ প্ৰয়োজন।

তেওঁ কয় যে ৰোগীসকলক অক্সিজেন দিব নোৱাৰাটো অত্যন্ত বেদনাদায়ক বিষয়।

চিকিৎসালয়ত বিচনাৰ অভাৱৰ সম্পৰ্কে তেওঁ কয় যে ভাৰতে অস্থায়ী চিকিৎসালয় তৈয়াৰ কৰা প্ৰয়োজন, যি একেৰাতিতে সজা হ’ব আৰু প্ৰয়োজনত অন্য স্থানলৈ লৈ যোৱা হ’ব।

তেওঁ কয় যে যোৱা বছৰ চীনে এই পস্থা অৱলম্বন কৰিছিল।

উল্লেখযোগ্য যে চিকিৎসা বিশেষজ্ঞজনে শেহতীয়াকৈ ধাৰাবাহিকভাৱে ভাৰতৰ ক’ভিড-১৯ পৰিস্থিতি সম্পৰ্কে নিজৰ মত প্ৰকাশ কৰি আহিছে।

কিছুদিন পূৰ্বে তেওঁ কৈছিল যে ভাৰতে ক’ভিড-১৯ক ৰোধ কৰিবৰ বাবে দেশজুৰি লকডাউন বলৱৎ কৰাৰ প্ৰয়োজন।