ন-ভৱিষ্যতৰ ইঙ্গিত দি ফাইনেলত থমকিল প্ৰগনানন্দা

দেশবাসীৰ মুখত কালি চন্দ্ৰজয়ৰ সুখ; আজি আশা কৰিছিল বিশ্বজয়ৰ সুখানুভূতি! পিছে ক্ষণিকৰ বাবে এই আশা ভংগ হ’ল দেশবাসীৰ। ডবা বিশ্বত ৰাজকীয় পদাৰ্পণৰ ইঙ্গিত বহন কৰি বিশ্বজয়ৰ দ্বাৰত উপনীত হোৱা ভাৰতীয় তৰুণ প্ৰগনানন্দাৰ গতি থমকিব লগা হ’ল ফাইনেলত।

দুটাকৈ ৰাউণ্ডত বিশ্বৰ শীৰ্ষ স্থানৰ ডবা খেলুৱৈ মেগনাছ কাৰ্লছেনক তীব্ৰ প্ৰতিদ্বন্দিতা আগবঢ়াই ড্ৰ’ খেলিবলৈ বাধ্য কৰা প্ৰগনানন্দাই দেশবাসীৰ স্বপ্ন পূৰণৰ আশা দেখুৱাইছিল। ডবাৰ অঘোষিত সম্ৰাট বিশ্বনাথন আনন্দৰ পিছত আন এগৰাকী বিশ্বজয়ী তাৰকাৰ সম্ভাৱ্য আগমণত উৎফুল্লিত হৈ উঠিছিল দেশবাসী।

নহ’বনো কিয়! ইতিপূৰ্বে নৰৱে’ন তাৰকাগৰাকীক ৫ বাৰকৈ পৰাস্ত কৰি প্ৰগনানন্দাই নিজকে প্ৰমাণিত কৰিছিল। পিছে বিশ্ব কাপৰ ফাইনেলত নিজৰ অভিজ্ঞতাৰ জোৰত তৰুণ প্ৰজ্ঞানন্দৰ তীব্ৰ প্ৰতিদ্বন্দিতা নেওচি টাই-ব্ৰেকাৰত শেষ হাঁহি মাৰিবলৈ সক্ষম হয় কাৰ্লছেন।

টাই- ব্ৰেকাৰৰ প্ৰথম দুয়োটা গেমত জয়েৰে কাৰ্লছেনে কেৰিয়াৰৰ প্ৰথমটো বিশ্বকাপ খিতাপ অৰ্জন কৰিবলৈ সক্ষম হয়। অভিজ্ঞ তাৰকাগৰাকীৰ বিৰুদ্ধে হাৰ মানিলেও অৱশ্যে ১৮ বৰ্ষীয় প্ৰগনানন্দাই নিজতকৈ ওপৰৰ ৰেংকৰ কেইগৰাকীমান খেলুৱৈক পৰাস্ত কৰি ফাইনেলত প্ৰৱেশেৰে ৰানাৰ আপ সন্মান আৰ্জে।

লগতে ফাইনেলত আগবঢ়োৱা প্ৰদৰ্শনেৰে প্ৰগনানন্দাই ডবা বিশ্বক দিলে এক ন-ভৱিষ্যতৰ ইঙ্গিত। বিশ্বনাথন আনন্দৰ পিছত ডবা বিশ্বকাপৰ ফাইনেলত প্ৰৱেশ কৰা একমাত্ৰ খেলুৱৈ হিচাপেও এক অনন্য সাফল্যৰ অধিকাৰী হয় যুৱ তাৰকাগৰাকী।