ডি এছ পি সূৰ্যকান্ত মৰাঙৰ গ্ৰেপ্তাৰৰ দাবীত দল-সংগঠনৰ তীব্ৰ প্ৰতিবাদ

আজি সন্তোষ হোজাই হত্যাকাণ্ডৰ প্ৰতিবাদ আৰু ডি এছ পি সূৰ্যকান্ত মৰাঙৰ গ্ৰেপ্তাৰৰ দাবীত হাৰাঙ্গাজাও জিছৰু ষ্ট্যাচু চৌহদত হাৰাঙ্গাজাওৰ বিভিন্ন দল-সংগঠনে লকডাউন প্ৰত্যাখ্যান কৰি ঘৰৰ পৰা ওলাই আহি ধৰ্ণা কাৰ্যসূচীত ভাগ লয়।

হাতে হাতে প্লেকাৰ্ড লৈ ওলাই অহা ৰাইজে চি বি আই তদন্তৰ দাবী উত্থাপন কৰাৰ উপৰি সূৰ্যকান্ত মৰাঙৰ পুত্তলিকা দাহ কৰে।

উল্লেখ্য যে যোৱা ২৪ এপ্ৰিলত হাৰাঙ্গাজাওৰ নিজ গৃহৰ পৰা অপহৃত হোৱা প্ৰাক্তন ডি এইচ্ছ ডি সদস্য সন্তোষ হোজাইৰ মৃতদেহ যোৱা ৩০ এপ্ৰিলত লাংটিং আৰক্ষী থানাৰ অন্তৰ্গত লাইলিং এলেকাত মাটিত পুতি থোৱা অৱস্থাত উদ্ধাৰ হৈছিল।

মৃতদেহ উদ্ধাৰৰ পিছতে এই অপহৰণ আৰু হত্যাকাণ্ডত সূৰ্যকান্ত মৰাং প্ৰত্যক্ষ ভাৱে জড়িত থকাৰ অভিযোগ উত্থাপিত হৈছিল। সেয়ে এতিয়া ডিমা হাচাও আৰক্ষীয়ে অতি শীঘ্ৰে ডি এছ পি মৰাঙক গ্ৰেপ্তাৰ কৰিব লাগে বুলি সাধাৰণ লোকে দাবী জনাইছে।

আডছু ডিমা হাছাও জিলা সভাপতি উত্তম লাংঠাচাই কয়, ‍‘লকডাউনৰ মাজত ইমান ডাঙৰ ঘটনা সংঘটিত হ’ল কিন্তু আৰক্ষীয়ে আজিকোপতি এজন ব্যক্তিকো গ্ৰেপ্তাৰ কৰা নাই, এয়া আচৰিত আৰু দুৰ্ভাগ্যজনক। যিহেতু ডি এছ পি সূৰ্যকান্ত মঙৰ নাম এই হত্যাৰ সৈতে সাঙুৰ খাইছে আৰু তথ্য প্ৰমাণ আছে, সেয়ে তেওঁক গ্ৰেপ্তাৰ কৰিব লাগে’।

ইয়াৰ উপৰি অপহৰণ আৰু হত্যাৰ লগত জড়িত সকলো ব্যক্তিকে কৰায়ত্ত কৰি দৃষ্টান্ত মূলক শাস্তি দিয়াৰো দাবী জনায়।