চিৰদিনৰ বাবে নিশ্চুপ হৈ পৰিল ‘বেবী তবছুম’: প্ৰবীণ অভিনেত্ৰী তবছুম গ’ভিলৰ দেহাৱসান

চিৰনিদ্ৰাত ঢলি পৰিল দেশৰ অভিনয় জগতৰ এক পৰিচিত মুখ তথা প্ৰবীণ অভিনেত্ৰী তবছুম গ’ভিল। হৃদযন্ত্ৰৰ ক্ৰিয়া বন্ধ হোৱাৰ ফলত আজি মুম্বাইত শেষ নিশ্বাস ত্যাগ কৰে অভিনেত্ৰী গৰাকীয়ে।

মৃত্যুৰ সময়ত জনপ্ৰিয় অভিনেত্ৰীগৰাকীৰ বয়স আছিল ৭৮ বছৰ। মৃত তবছুমৰ পুত্ৰ হ’চাং গ’ভিলে মাতৃ বিয়োগৰ বিষয়ে সদৰী কৰি সংবাদ মাধ্যমৰ আগত দিয়া ভাষ্য মতে কেইদিনমান পূৰ্বে অসুস্থ হৈ পৰা তবছুম গ’ভপৰক চিকিৎসালয়ত ভৰ্তি কৰা হৈছিল।

গেষ্ট্ৰ’ সমস্যাত ভুগি থকা অভিনেত্ৰীগৰাকীক চেক আপৰ বাবে চিকিৎসালয়লৈ লৈ যোৱা হৈছিল। নিশা ৮.৪০ আৰু ৮.৪২ বজাত দুটাকৈ কাৰ্ডিয়াক এটেক হোৱাৰ পিছত তেওঁৰ স্বাস্থ্যৰ অৱস্থা সংকটজনক হৈ পৰিছিল। অৱশেষত শুকুৰবাৰে নিশা প্ৰবীণ অভিনেত্ৰীগৰাকীৰ মৃত্যু হয় বুলি পুত্ৰ হ’চাং গ’ভিলে সদৰী কৰে।

উল্লেখ্য যে, ১৯৪০ চনৰ শেষৰ ফালে শিশু শিল্পী হিচাপে চলচ্চিত্ৰ জগতত কেৰিয়াৰ আৰম্ভ কৰা প্ৰবীণ অভিনেতাগৰাকীয়ে পিছলৈ অভিনয় জগতত যথেষ্ট খ্যাতিমান হৈ পৰিছিল। ‘বেবী তবছুম’ নামেৰে অনুৰাগীৰ মাজত জনপ্ৰিয় হৈ পৰিছিল অভিনেত্ৰীগৰাকী।

নাৰ্গিছ (১৯৪৭), মেৰা চুহাগ (১৯৪৭), মঞ্জধৰ (১৯৪৭), বৰী বেহেন (১৯৪৯), দীদাৰ (১৯৫১) আৰু স্বৰ্গ (১৯৯০) আদি ছবিত অভিনয় কৰাৰ উপৰিও তবছুমে ১৯৭২ চনৰ পৰা ১৯৯৩ চনলৈ দূৰদৰ্শনৰ জনপ্ৰিয় চেলিব্ৰিটি টক শ্ব’ ‘ফুল খিলে হেঁ গুলচন গুলচন’ৰ ঘোষিকা ৰূপে পৰিচালনা কৰিছিল।

দেশত ক’ভিদৰ ভয়াৱহতাৰ সময়তে ২০২১ চনত তবছুমো আক্ৰান্ত হৈছিল ক’ভিদত। প্ৰায় ১০ দিন চিকিৎসালয়ত কটোৱাৰ পিছত ক’ভিদৰ পৰা আৰোগ্য লাভ কৰিছিল অভিনেত্ৰীগৰাকীয়ে।

আজি এই প্ৰবীণ অভিনেত্ৰীগৰাকীৰ দেহাৱসানৰ পৰিণতিত শোকৰ ছাঁ পৰিছে চলচ্চিত্ৰ জগতৰ লগতে তেওঁৰ গুণমুগ্ধ অনুৰাগীৰ মাজত।