গুৱাহাটীত সংবাদমেলত বিৰাট কোহলিয়ে ‘কা’লৈ নিজৰ মত প্ৰকাশ কৰিলে

কাইলৈ অৰ্থাৎ ৫ জানুৱাৰিৰ পৰা গুৱাহাটীৰ বৰ্ষাপাৰা ষ্টেডিয়ামত ভাৰত-শ্ৰীলংকাৰ মাজৰ টি-২০ খেল অনুষ্ঠিত হ’ব। ইতিমধ্যে দুয়োটা দলৰ খেলুৱৈসকল আহি গুৱাহাটীত উপস্থিত হৈছেহি। লগতে দুয়োটা দলৰ খেলুৱৈ সকলে কঠোৰ অনুশীলনত ব্যস্ত হৈ পৰিছে।

ইফালে গুৱাহাটীত উপস্থিত হোৱাৰ পিছতে ভাৰতীয় দলৰ অধিনায়ক বিৰাট কোহলিয়ে আজি এক সংবাদমেলৰ আয়োজন কৰে। সংবাদমেলত কোহলিয়ে কয়, “শ্ৰীলংকাৰ বিৰুদ্ধে আমি জয় হ’ম গুৱাহাটীত। সম্মুখত টী-২০ বিশ্বকাপ আছে, সেয়ে নৱাগতসকলৰ বাবে এই তিনিখন টী-২০ এটা ভাল সুযোগ হ’ব৷”

দেওবাৰে হ’ব লগীয়া খেলখনত কে এল ৰাহুল আৰু শিখৰ ধাৱনে অপেনাৰৰ দায়িত্বত থাকিব বুলি সংবাদমেলত কোহলিয়ে উল্লেখ কৰি কয় ভাৰতত প্ৰতিভা থকা খেলুৱৈৰ অভাৱ নাই।

আনহাতে নাগৰিকত্ব (সংশোধন) আইনৰ সন্দৰ্ভত সোধা প্ৰশ্নৰ উত্তৰত কোহলিয়ে কয় যে তেওঁ এই সম্পৰ্কত জ্ঞাত নহয় গতিকে সমৰ্থন বা বিৰোধ কৰি কোনো মন্তব্য নকৰে।

“গুৱাহাটীত ‘কা’ক লৈ এতিয়া কিবা হৈ আছে যদিও মই নাজানো কিন্তু আমি এতিয়া লৈ সুৰক্ষিত আৰু শান্তি ভাবেই আছো ৷ সেই বাবে মই মন্তব্য কৰিব নোখোজো।” মন্তব্য বিৰাট কোহলিৰ।

লগতে সংবাদমেলত কোহলিয়ে গুৱাহাটী সন্দৰ্ভত ‘The City is absolutely Safe’ বুলিও মন্তব্য কৰে।