উচ্চতম ন্যায়ালয়ৰ ৰায়ৰ পাছত সংকটত ভোডাফোন আইডিয়া

কেন্দ্ৰীয় চৰকাৰৰ ওচৰত এডজাষ্টেড গ্ৰছ ৰেভিনিউ (এ জি আৰ)ৰ আদায় দিবলগীয়া  থকা টকা আদায় দিয়াৰ বাবে তৎপৰ হৈ পৰিছে টেলিকম সংস্থাসমূহ।

সোমবাৰৰ ভিতৰতে এয়াৰেটেল, ভোডাফোন, আইডিয়া আৰু টাটাই তেওঁলোকৰ অনাদায়ী টকা পৰিশোধ কৰিব বুলি জানিব পৰা গৈছে।

ইয়াৰ অন্যথা এই টেলিকম সংস্থাসমূহৰ বিৰুদ্ধে কেন্দ্ৰীয় চৰকাৰে ব্যৱস্থা গ্ৰহণ কৰিব।

এ জি আৰৰ বাবদ টেলিকম সংস্থাসমূহৰ পৰা কেন্দ্ৰই মুঠ ১ লাখ ৪৭ হাজাৰ কোটি টকা পাবলৈ আছে।

ইয়াৰ ভিতৰত ভাৰতী এয়াৰটেল, ভোডাফোন, আইডিয়া আৰু টাটা টেলি চাৰ্ভিছৰ পৰাই কেন্দ্ৰই পাবলগীয়া টকাৰ পৰিমান ১ লাখ কোটি টকাৰো অধিক।

উক্ত তিনিটা টেলিকম সংস্থাই এতিয়াই তেওঁলোকৰ অনাদায়ী সম্পূৰ্ণ টকা পৰিশোধ কৰাটো সম্ভৱ নহয় বুলি দূৰ সংযোগ বিভাগত জনাই দিছে। তেওঁলোকে মুঠ বাকী থকা টকাৰ এটা অংশ এতিয়া আদায় দিব বুলিও জনাইছে।

এই টেলিকম সংস্থাই অহা দিনত বাকী থকা টকাৰ কিমান পৰিমান পৰিশোধ কৰে তালৈ বাট চাইছে কেন্দ্ৰীয় চৰকাৰে। বিভাগৰ এক সূত্ৰই জানিবলৈ দিয়া মতে এই তেওঁলোকৰ জমা দিয়া টকাৰ পৰিমান জনাৰ পাছতে গোটেই বিষয়টো পৰ্যালোচনা কৰা হ’ব।

আনহাতে, টেলিকম সংস্থাসমূহৰ অনাদায়ী ধন আদায়ৰ ক্ষেতেৰত অধিক সময় দিবলৈ আগ্ৰহী নহয় কেন্দ্ৰ।

উল্লেখযোগ্য যে বিগত ২৪ অক্টোবৰৰ নিৰ্দেশত উচ্চতম ন্যায়ালয়ে চলিত বৰ্ষৰ ২৩ জানুৱাৰিৰ ভিতৰত টেলিকম সংস্থাসমূহক প্ৰায় ১ লাখ ৪৭ হাজাৰ কোটি অনাদায়ী টকা পৰিশোধ কৰিবলৈ কৈছিল।

সুদীৰ্ঘ ১৪ বছৰ ধৰি চলা এটা গোচৰত টেলিকম সংস্থাসমূহক লাইচেন্স আৰু স্পেকট্ৰাম ব্যৱহাৰৰ মাচুল হিচাপে এই টকা আদায় দিবলৈ কোৱা হৈছিল। ইয়াৰ বিতৰত আধা অংশ সুত আৰু জৰিমনা।

এতিয়া এনে বৃহৎ ধন আদায় দিবলৈ বাধ্য হোৱা টেলিকম সংস্থা ভোডাফোন আইডিয়াৰ সন্মুখত এক ডাঙৰ সংকটে দেখা দিছে।