সভাপতি ৰাজবংশীক অপমানত সেও নামানি “অসমীয়া” ৰক্ষাৰ ৰণ জয় সাহিত্য সভাৰ

সভাপতি পৰমানন্দ ৰাজবংশীক কৰা অপমানত সেও নামানি অসম সাহিত্য সভাই বুধবাৰে অসমীয়া ভাষা ৰক্ষাৰ এক ৰণত বিজয় সাব্যস্ত কৰিছে।

ডাক সেৱাৰ পৰীক্ষা এটাত অৰ্হতাৰূপে “অসমীয়া” ভাষা ৰক্ষাৰ বাবে যোৱা দলটোক প্ৰথমে উলিয়াই পঠিয়াইছিল গুৱাহাটীৰ মেঘদূত ভৱনৰ পৰা।

কাৰ্য্যালয়টোৰ সঞ্চালক কে কেবিচুচাই প্ৰথমে “গে’ট আউট” বুলি আমাক ধমক দিছিল, সভাৰ সভাপতি পৰমানন্দ ৰাজবংশীয়ে জনায়।

কিন্তু সভাপতিক অপমানৰ পিছতেই উভটি ধৰা সভাৰ সঁজাতি দলটোৱে অৱশেষত হাচিল কৰিলে নিজৰ লক্ষ্য।

ক্ষমা খুজিলে সঞ্চালকে, আৰু ডাক বিভাগৰ পৰীক্ষাটোত অসমৰ সকলো এলেকাতে অসমীয়া ভাষাক মান্যতা দিয়াৰ আশ্বাস প্ৰদান কৰিলে।

সৰ্বভাৰতীয় গ্ৰামীন ডাক সেৱকৰ পৰীক্ষাটোত অসমত অসমীয়া ভাষাক স্থানীয় ভাষাৰূপে মান্যতা দিয়া হৈছিল, কিন্তু বিটিএডি আৰু বৰাক উপত্যকাত সেই নিয়ম বাহাল নাছিল।

বিটিএডিত কেৱল বড়ো ভাষা আৰু বৰাক উপত্যকাত কেৱল বাংলা ভাষাক সেই মান্যতা দিয়া হৈছিল।

ৰাজবংশীৰ মতে, ডাক সেৱা বিভাগৰ এনে ত্ৰুটিৰ বাবে বড়ো নাইবা অন্যান্য ভাষা-ভাষীৰ মাজত সংঘৰ্ষৰ সৃষ্টি হ’ব। বা বৰাক উপত্যকাতো বাংলা আৰু অন্যান্য ভাষা-ভাষীৰ মাজত সংঘৰ্ষৰ সৃষ্টি হ’ব বুলি তেওঁ আশংকা প্ৰকাশ কৰে।

“এই সংঘৰ্ষৰ সোনকালে নিৰাময় হওক বুলি কালি ৰাজ্য চৰকাৰৰ অতিৰিক্ত মুখ্য সচিবক সাক্ষাৎ কৰা হৈছিল। তেওঁ  ইতিমধ্যে ডাক সেৱা বিভাগলৈ অসমীয়া ভাষাটোক আগস্থান দিবলৈ এক পত্ৰ লিখিছে,” ৰাজবংশীয়ে জনায়।

আনহাতে মেঘদূত ভৱনত সৃষ্টি হোৱা অপ্ৰীতিকৰ পৰিস্থিতিৰ বাবে ৰাজবংশীয়ে ডাক বিভাগৰ অসম সংমণ্ডলৰ অসমীয়া বিষয়া কেইজনমানক দোষাৰোপ কৰিছে।

“তেওঁ আচলতে জনা নাছিল কিমান গুৰুত্বপূৰ্ণ বিষয় লৈ তেওঁৰ ওচৰত আলোচনাৰ বাবে  গৈছিলো। সাহিত্য সভা কি সেই বিষয়েও ভালদৰে অৱগত নাছিল। আচলতে যিসকল অসমীয়া বিষয়া আছে তেওঁলোকে ভালদৰে বিষয়টো বুজাই নিদিয়াৰ বাবে এনেধৰণৰ ঘটনা ঘটিবলৈ পালে। ডাক সেৱা বিভাগৰ অসম মণ্ডলৰ কৰ্মকৰ্তাৰ দোষৰ বাবেই এই পৰিস্থিতিৰ সৃষ্টি হৈছে,” ৰাজবংশীয়ে কয়।

ডাক বিভাগৰ গ্ৰামীন সেৱকৰ পদৰ বাবে আবেদনৰ অন্তিম সময় পূৰ্বে ৪ ছেপ্তেম্বৰ আছিল যদিও এতিয়া সেয়া ৭ ছেপ্তেম্বৰলৈকে বঢ়াই দিয়া হৈছে। অনলাইন আবেদনৰ অন্তিম দিন হৈছে ১১ ছেপ্তেম্বৰ।