এই বান্ধ বাঁহৰে বান্ধ, বাৰে বাৰে বান্ধিব কিমান? ব্ৰহ্মপুত্ৰৰ খহনীয়া ৰোধৰ বাবে তৎপৰ জলসম্পদ বিভাগ!
যি সময়ত জলসম্পদ বিভাগৰ লগত জৰিত অভিযন্তাসকলে বিভিন্ন পৰিকল্পনা গৱেষণাৰ মাজেৰে প্ৰৱল বানক বাধা দিব পৰা বান্ধ নিৰ্মাণ কৰাৰ বাবে অহৰহ প্ৰচেষ্টা অব্যাহত ৰাখিছে সেই সময়তে এই অসমতে বিশ্বনাথত উদ্ভাৱন হৈছে এক নতুন প্ৰচেষ্টা ।
কাৰণ এইবাৰ বাঁহৰ ক্ৰীবচ্ বনাই বিশাল ব্ৰহ্মপুত্ৰৰ গৰাখহনীয়া ৰোধৰ চেষ্টা অদূৰদৰ্শী ৰাজ্যৰ বিয়াগোম জলসম্পদ বিভাগৰ।
বিশ্বনাথ পাণপুৰ মথাউৰিৰ নিচেই কাষত ৪নং কুমলীয়াৰ জুলাপাৰা অঞ্চলত গৰাখহনীয়াই তীব্ৰ ৰূপ ধাৰণ কৰিছে। তেনে ক্ষেত্ৰত এতিয়া জলসম্পদ বিভাগে কেৱল কেইটামান বাঁহৰ ক্ৰীৱচ দি এতিয়া বিশাল লুইতৰ গৰাখহনীয়া ৰোধ কৰাৰ চেষ্টা কৰিছে।
ইয়াৰ বাবে এতিয়া জাঙুৰ খাই উঠিছে নৈপৰীয়া ৰাইজ আৰু আমছু। নৈপৰীয়া ৰাইজে অভিযোগ কৰা মতে জলসম্পদ বিভাগৰ হেমাহি আৰু দালালৰূপী ঠিকাদাৰ সকলৰ দালালৰাজৰ বাবেই এনেদৰে বিপদত পৰিছে নৈ পৰীয়া ৰাইজ।
বিগত ২০ বছৰ ধৰি বাঁহৰ ক্ৰীবচ্ লগাই খহনীয়া প্ৰতিৰোধ কৰিবলৈ অপচেষ্টা কৰাৰ ফলতেই ব্ৰহ্মপুত্ৰই প্ৰায় ১০ কিলোমিটাৰ ভূমি খহাই নিছে বুলিও অভিযোগ উত্থাপন কৰিছে স্থানীয় ৰাইজে।
আমছু আৰু নৈপৰীয়া ৰাইজে বাৰম্বাৰ খহনীয়া হৈ থকা স্থানত জিঅ’ বেগ দিবলৈ অনুৰোধ জনাই থকা স্বত্বেও জলসম্পদ বিভাগে ৰাইজৰ কথালৈ কোনো গুৰুত্ব নিদি বাঁহৰ ক্ৰীবচ্ দি খহনীয়া ৰোধ কৰাৰ বাবেই এতিয়া বিপদত পৰিছে নৈপৰীয়া ৰাইজ। আনকি ব্ৰহ্মপুত্ৰৰ কোবাল সোঁতত উটি গৈছে এই বাঁহৰ ক্ৰীবচ্ ।
ইফালে ৰাজ্যৰ জলসম্পদ মন্ত্ৰী তথা বিশ্বনাথৰ অভিভাৱক মন্ত্ৰী পীযুষ হাজৰিকাই কিছুদিন পূৰ্বে উক্ত স্থানত খহনীয়া পৰিদৰ্শন কৰা কালত বাঁহৰ দ্বাৰা নহ’ব বুলি কোৱা স্বত্বেও মন্ত্ৰী গৰাকীৰ মন্তব্যক বৃদ্ধাংগুষ্ঠ প্ৰদৰ্শন কৰি বিশ্বনাথৰ জলসম্পদ বিভাগে এনেদৰে বাঁহৰ ক্ৰীৱচ্ দিয়া কাৰ্যই এক ডাঙৰ ৰহস্যৰ সৃষ্টি কৰিছে।
প্ৰশ্ন হয়, জলসম্পদ মন্ত্ৰী গৰাকীৰ নিৰ্দেশকো বুঢ়া আঙুলি দেখুওৱা বিভাগৰ মুৰব্বী সকলে কেতিয়া সাৰ পাব ? নে এনেদৰেই ল’ৰা ধেমালি আৰু তৎপৰতা দেখুৱাই সামৰণি মাৰিব ৰাজ্যৰ অদূৰদৰ্শী বিয়াগোম জলসম্পদ বিভাগে ??