সজাগতা সৃষ্টিৰ প্ৰয়াস : ক’ত বিক্রী হৈছে ‘কৰ’না’ মিঠাই?

গোটেই বিশ্বতে কৰ’না ভাইৰাছৰ আতংকই বিৰাজ কৰিছে। সকলোৱে এতিয়া কৰ’না ভাইৰাছৰ চিকিৎসাৰ সন্ধান চলাইছে। ভাৰততো কৰ’নাৰ সংক্ৰমণ ৰোধৰ বাবে চৰকাৰে নিৰন্তৰ প্ৰয়াস অব্যাহত ৰাখিছে।

ইয়াৰ লগে লগে জনসাধাৰণৰ মাজত সজাগতা সৃষ্টিৰ প্ৰয়াসেৰে এগৰাকী ব্যক্তিয়ে “এন্টি কৰ’না মিঠাই’ তৈয়াৰ কৰিছে।

জানি আচৰিত হ’ব যে পশ্চিমবংগত ‘এন্টি কৰ’না ছুইট’ নামেৰে এবিধ মিঠাই বিক্ৰী হৈছে। এই মিঠাই কৰ’না সন্দৰ্ভত সজাগতা চলোৱাৰ উদ্দেশ্যেৰে বজাৰত বিক্ৰী কৰা হৈছে।

এই মিঠাই যাদৱপুৰৰ হিন্দুস্তান ছুইটছে তৈয়াৰ কৰিছে। আগশাৰীৰ মিঠাই প্ৰস্তুতকৰ্তা হিচাপে পৰিচিত এই মিঠাইৰ দোকানত ‘সন্দেশ’ক কৰ’না ভাইৰাছৰ ৰূপত তৈয়াৰ কৰিছে।

বিশেষভাৱে এই মিঠাইবিধক কৰ’না ভাইৰাছৰ জৈবিক বিৱৰণ আৰু আকৃতিৰে তৈয়াৰ কৰা হৈছে যাতে মিঠাইৰ জৰিয়তে ৰাইজৰ মাজত সজাগতা সৃষ্টি কৰিব পৰা যায়।

এই মিঠাইৰ লগতে লোকক এটি বাৰ্তাও দিয়া হৈছে-‘’আমি কৰ’নাক প্ৰতিহত কৰিব পাৰো।‘’

হিন্দুস্তান ছুইটছৰ মালিক ৰবীন্দ্ৰ কুমাৰ পালে কয় যে ‘’আমি এন্টি কৰ’না ছুইট’ তৈয়াৰ কৰিছো। কৰ’না ভাইৰাছ সম্পৰ্কে মানুহক সজাগ কৰিবলৈ আমি এই মিঠাই তৈয়াৰ কৰিছো। মই ভাৱো মানুহে ইয়াক ভয় কৰা উচিত নহয়। আমাৰ শ্ল’গান হ’ল ‘আমি কৰ’নাক পৰাস্ত কৰিম আৰু আমি ইয়াক ভয় নকৰো।‘

ৰবীন্দ্ৰ পালে লগতে কয়,’’আমাৰ বিশ্বাস আছে যে আমি এই যুঁজত জয়ী হ’ম। মই প্ৰতিজন গ্ৰাহককে এই মিঠাই সোৱাদ ল’বলৈ দিম। আমি কেবল মিঠাইয়ে নহয়, চৰকাৰক লোকক কোৱাৰেন্টাইনত ৰাখিবৰ কাৰণে পাঁচ মহলীয়া অট্টালিকাও দিছো।‘’

তেওঁ ৰাজ্য চৰকাৰৰ সাহায্য কোষলৈ এক লাখ টকাও আগবঢ়াইছে।

উল্লেখযোগ্য যে যোৱা সপ্তাহত পশ্চিমবংগ চৰকাৰে লকডাউনৰ মাজতে মিঠাইৰ দোকান দিনে চাৰি ঘন্টা খোলা ৰাখিবলৈ দিছে।