অ’মিক্ৰণক সহজভাৱে নল’ব; সতৰ্ক কৰি দিলে WHOৰ মুৰব্বীয়ে
অ’মিক্ৰণক সহজভাৱে লোৱাটো উচিত নহয়, ইয়াক গুৰুত্ব সহকাৰে লওক। বৃহস্পতিবাৰে এখন সংবাদমেলত এইদৰে সতৰ্ক কৰি দিলে বিশ্ব স্বাস্থ্য সংস্থাৰ মুৰব্বী টেড্ৰ’ছ অধানম ঘেব্ৰিয়াছুছে।
তেওঁ কয় যে সমগ্ৰ বিশ্বতে অ’মিক্ৰণে প্ৰভাৱ পেলাইছে। বহু লোকে প্ৰাণ হেৰুৱাইছে আৰু ইয়াৰ দ্ৰুত সংক্ৰমণ বিয়পিছে। যিবোৰ দেশত ইমানদিন ডেল্টাৰ প্ৰভাৱ আছিল তাত এতিয়া অ’মিক্ৰণে আতংকৰ সৃষ্টি কৰিছে।
WHO ৰ মুৰব্বীগৰাকীয়ে কয়, ‘’ডেল্টাৰ তুলনাত অ’মিক্ৰণ কম ক্ষতিকাৰক। সেইবুলি ইয়াৰ প্ৰভাৱক কোনো কাৰণতে সাধাৰণ বুলি ক’ব নোৱাৰি। পূৰ্বৰ ভেৰিয়েন্টসমূহৰ দৰেই অ’মিক্ৰণত আক্ৰান্ত হৈ মানুহ হাস্পাতালত ভৰ্তি হ’বলগীয়া হৈছে। মানুহে প্ৰাণো হেৰুৱাইছে।‘’
তেওঁ লগতে কয়, ‘’আটাইতকৈ ডাঙৰ কথা অ’মিক্ৰণ দ্ৰুতভাৱে বিয়পিছে। ইয়াৰ ফলত বিশ্বত কৰ’নাৰ এক ছুনামি আহিছে। ইয়াৰ ফলত শীঘ্ৰেই স্বাস্থ্য ব্যৱস্থা ভাঙি পৰিব পাৰে।‘’
বিশ্ব স্বাস্থ্য সংস্থাই জানিবলৈ দিয়া মতে বিগত সপ্তাহত বিশ্বত অভিলেখ সংখ্যক ৯.৫ মিলিয়ন লোক কৰ’নাত আক্ৰান্ত হৈছে। পূৰ্বৰ সপ্তাহৰ তুলনাত এয়া ৭০শতাংশ বৃদ্ধি পাইছে।
লগতে পঢ়ক:কৰ’নাত আক্ৰান্ত গুৱাহাটীৰ সাংসদ কুইন ওজা; জিএমচিএইচত ভৰ্তি
WHO ৰ মুৰব্বীগৰাকীয়ে লগতে কয় যে যিসকলে কৰ’নাৰ ভেকচিন লোৱা নাই তেওঁলোকৰ বাবে অ’মিক্ৰণ মাৰাত্মক। তেওঁ অ’মিক্ৰণৰ লগতে ডেল্টাৰ সংক্ৰমণৰ প্ৰতিও সতৰ্ক হৈ থকাৰ আহ্বান জনায়।