লক্ষ্মী সিংঃ উত্তৰ প্ৰদেশৰ আৰক্ষীত প্ৰথমবাৰৰ বাবে নিযুক্ত মহিলা আয়ুক্ত

মহিলাসকল এতিয়া বিভিন্ন ক্ষেত্ৰত আগুৱাই গৈছে। এনে সময়তে উত্তৰ প্ৰদেশৰ আৰক্ষীত প্ৰথমবাৰৰ বাবে নিযুক্ত দিয়া হৈছে প্ৰথম মহিলা আয়ুক্ত। শেহতীয়াকৈ আইপিএছ বিষয়া লক্ষ্মী সিঙক নয়ডাৰ নতুন শীৰ্ষ আৰক্ষী বিষয়া হিচাপে নিযুক্তি দিয়া হৈছে।

তেওঁ উত্তৰ প্ৰদেশৰ আৰক্ষী আয়ুক্ত হিচাবে নিযুক্ত হোৱা প্ৰথম গৰাকী মহিলা বিষয়া হিচাপে পৰিগণিত হৈছে । ৪৮ বছৰীয়া লক্ষ্মীয়ে গৌতম বুদ্ধ নগৰত আলোক সিঙৰ স্থানত উক্ত দায়িত্ব গ্ৰহণ কৰিব। তেওঁ বুধবাৰে দায়িত্ব গ্ৰহণ কৰাৰ সম্ভাৱনা আছে।

১৯৯৫ বেটচৰ আইপিএছ বিষয়া আলোকক এতিয়া লক্ষ্ণৌৰ ডিজিপি কাৰ্যালয়ত অতিৰিক্ত আৰক্ষী সঞ্চালক প্ৰধান (এডিজিপি) হিচাপে নিযুক্তি দিয়া হৈছে।গাজিয়াবাদ, আগ্ৰা আৰু প্ৰয়াগৰাজতো নতুন আৰক্ষী আয়ুক্ত নিযুক্তি দিয়া হৈছে। এক চৰকাৰী নিৰ্দেশ অনুসৰি অজয় মিশ্ৰক গাজিয়াবাদৰ আয়ুক্ত, আগ্ৰাৰ প্ৰীতিন্দৰ সিং আৰু প্ৰয়াগৰাজৰ ৰমিত শৰ্মাক নিযুক্তি দিয়া হৈছে।

লক্ষ্মী সিঙে মেকানিকেল ইঞ্জিনিয়াৰিঙত বিটেক ডিগ্ৰী লাভ কৰিছিল । ভাৰতীয় আৰক্ষী সেৱাত কৃতকাৰ্য হোৱাৰ পিছত তেওঁ ২০০৪ চনত জ্যেষ্ঠ আৰক্ষী অধীক্ষক হিচাপে নিযুক্তি লাভ কৰিছিল।