পৰম্পৰা! হোলীৰ সময়ত এখন গাঁৱত পুৰুষসকলে লয় মহিলাৰ বেশ-ভূষা, আছে এক বিশেষ কাৰণ
বিগত দুটা দিন হোলীৰ আনন্দত ডুব গ’ল সমগ্ৰ দেশ। ৰঙৰ উৎসৱ ফাকুৱা উদযাপন কৰিলে দেশৰ সৰ্বপ্ৰান্তৰ লোকসকলে।
সাধাৰণতেই বৈচিত্ৰময় ভাৰতৰ প্ৰতিটো প্ৰান্তত স্থান বা জনসমষ্টি বিশেষে দেখিবলৈ পোৱা যায় পৃথক পৃথক ৰীতি-নীতি বা পৰম্পৰা।
উৎসৱ সমূহৰ ক্ষেত্ৰতো সেইদৰে স্থান ভেদে পৰম্পৰাৰ পাৰ্থক্য বহুসময়ত পৰিলক্ষিত হয়। ফাকুৱাৰ সময়তো দেশৰ এখন গাঁৱত পালন কৰি অহা হৈছে তেনে এক বিশেষ পৰম্পৰা।
অন্ধ্ৰ প্ৰদেশৰ কুৰনুল জিলাৰ আদোনি মণ্ডলৰ সান্থেকুডলুৰ নামৰ এখন গাঁৱত অনাদি কালৰে পৰা এক বিশেষ পৰম্পৰা পালন কৰি অহা হৈছে।
গাঁওখনৰ লোকসকলে হোলী উদযাপনৰ সময়ত পালন কৰি আহিছে এক অনন্য পৰম্পৰা।
সান্থেকুডলুৰ গাঁৱৰ পুৰুষসকলে হোলীৰ দিনটোত পূৰ্বৰে পৰা মহিলাৰ সাজ-পোছাক পৰিধান কৰি বিশেষ ধৰণে ৰীতি পালন কৰি আহিছে।
তেওঁলোকে মহিলাৰ সাজ-পোছাক পৰিধান কৰি, আ-অলংকাৰ তথা নানাৰঙী ফুলেৰে নিজকে সজাই তোলে।
এয়া গাঁওখনৰ পৰম্পৰা আৰু বিশ্বাসৰ চিৰস্থায়ী মনোভাৱৰ প্ৰতীক। নাৰীৰ সাজ-সজ্জাৰে সজ্জিত পুৰুষসকলে এইদৰে “ৰতি মনমথা” দেৱতাক আৰাধনা কৰে।
দেখাত আজৱ যেন লাগিলেও গাঁওবাসীয়ে পালন কৰা এই পৰম্পৰাৰ আঁৰত আছে এক বিশেষ কাৰণ।
স্থানীয় লোকৰ মতে, হোলীৰ উৎসৱত যদি ‘কামদেৱ’ক মহিলাৰ সাজ-পোছাক পৰিধান কৰি পুৰুষে পূজা কৰে, তেন্তে পৰিয়ালসমূহক সুখ আৰু সমৃদ্ধিৰ আশীৰ্বাদ দিয়া হ’ব বুলি বিশ্বাস কৰা হয়।