বন্যহস্তীৰ আক্ৰমণ: চন্দ্ৰপুৰৰ পানবাৰীত দুখন বাহনৰ বিস্তৰ ক্ষতি

গুৱাহাটীৰ চন্দ্ৰপুৰৰ পানবাৰী এলেকাত দেওবাৰে বনৰীয়া হাতীৰ আক্ৰমণত দুখনকৈ বাহনৰ বিস্তৰ ক্ষতি হয়। চন্দ্ৰপুৰ–ডিগাৰু পথৰে গৈ থকা এখন ইটা কঢ়িওৱা ট্ৰাক আৰু এখন চাৰিচকীয়া বাহন বন্যহস্তীৰ জাকে ভাঙি লণ্ডভণ্ড কৰে। অৱশ্যে সৌভাগ্যক্ৰমে দুয়োখন বাহনৰ চালক আৰু কৰ্মচাৰীসকল কথমপি প্ৰাণ ৰক্ষা কৰিবলৈ সক্ষম হয়।

জানিব পৰা মতে, যোৱা কিছুদিন ধৰি পানবাৰীৰ মিছামাৰী অঞ্চলত বন্যহস্তীৰ এটা জাকে ৰাজপথলৈ ওলাই আহি উপদ্ৰৱ চলাই আহিছে। সন্ধিয়াৰ সময়ত এটা হাতীয়ে বাহন দুখনৰ ওপৰত আক্ৰমণ চলোৱাৰ লগতে স্থানীয় এখন ধাবাতো ক্ষতিসাধন কৰে।

উল্লেখ্য যে কিছুদিন পূৰ্বে একেই অঞ্চলতে বন্যহস্তীৰ আক্ৰমণত এজন লোকৰ মৃত্যু হৈছিল। ইয়াৰ পিছতো বন বিভাগে ফলপ্ৰসূ ব্যৱস্থা গ্ৰহণ নকৰাৰ অভিযোগ উঠিছে। বন্যহস্তীৰ মুক্ত বিচৰণৰ ফলত স্থানীয় ৰাইজে তীব্ৰ আতংকৰ মাজত দিন কটাবলগীয়া হৈছে।