তামুলপুৰ-কলিয়াবৰত অব্যাহত বনৰীয়া হাতীৰ সন্ত্ৰাস, নিৰ্বিকাৰ বন বিভাগ

বাক্সা জিলাৰ তামুলপুৰ মহকুমাৰ নাগ্ৰীজুলিৰ ঢেঁকীপোতা, গান্ধীবাৰী আদি অঞ্চলত বুধবাৰে নিশা প্ৰৱেশ বনৰীয়া হাতীৰ জাকে।

নাগ্ৰীজুলিৰ ঢেঁকীপোতা , গান্ধীবাৰী আদি অঞ্চলত নিশা বনৰীয়া হাতীৰ জাকে প্ৰৱেশ কৰি শালি ধানৰ খেতিত চলালে উপদ্ৰৱ।

বিগত কেইবাদিনো ধৰি ভূটান পাহাৰৰ পৰা খাদ্যৰ সন্ধানত নামি অহা বনৰীয়া হাতীৰ বৃহৎ জাক এটাই অঞ্চলটোত মুক্ত ভাৱে বিচৰণ কৰি আছে।

বুধবাৰে নিশা গান্ধীবাৰীৰ কাকতি চুপাত বৃহৎ বনৰীয়া হাতীৰ জাকটোৱে প্ৰৱেশ কৰি মৃদুল কাকতি নামৰ লোক জনৰ প্ৰায় ১২ বিঘা কলৰ খেতি খাই নষ্ট কৰে।

একে গাঁৱৰে কেইবাজনো খেতিয়কৰ পকাধান খোৱাৰ লগতে গচকি নষ্ট কৰে।

মুছলপুৰ বনাঞ্চলিক বিষয়াৰ কাৰ্যালয়ত খবৰ দিয়াৰ পিছতো গুৰুত্ব  নিদিয়াৰ অভিযোগ কৰিছে ৰাইজৰ।
উপায়বিহীন কৃষকে হাত দিছে মূৰে কপালে।

ইপিনে কলিয়াবৰৰ ডলিবাৰীতো বন্যহস্তীৰ সন্ত্ৰাস চলিছে। নিশা বনাঞ্চলৰ পৰা আহি জনাঞ্চলত প্ৰৱেশ কৰি ত্ৰাসৰ সৃষ্টি কৰে খাদ্যৰ সন্ধানত ওলাই অহা এটা বনৰীয়া হাতীয়ে।

যোৱা নিশা ডলিবাৰীৰ জ্যোতি শৰ্মাৰ ঘৰত বনৰীয়া হাতীয়ে সন্ত্ৰাস চলায়।

হাতীয়ে ভাঙিলে ভঁড়াল ঘৰ আৰু গোঁসাই ঘৰ। পকী ঘৰৰ বেৰ ভাঙি বহু সময় ধৰি হাতীয়ে সন্ত্ৰাস চলায়। বন বিভাগৰ বিৰুদ্ধে হাতী খেদাত ব্যৰ্থ হোৱাৰ অভিযোগ।

আনহাতে কলিয়াবৰৰ বিভিন্ন প্ৰান্তত প্ৰতিদিনে বন্য হস্তীৰ উপদ্ৰৱ বৃদ্ধি পাবলৈ লৈছে।

প্ৰতিদিনেই বনাঞ্চল সমূহৰ পৰা খাদ্যৰ সন্ধানত ওলাই অহা বন্য হস্তীয়ে জনাঞ্চলত প্ৰৱেশ কৰি ত্ৰাসৰ সৃষ্টি কৰি আহিছে । কিন্তু হাতী খেদাত প্ৰায়ে বিফল হয় বন বিভাগৰ লোক।