টীয়কৰ মেলেং চাহ বাগিচাত বনৰীয়া হাতীৰ আক্ৰমণত এগৰাকী ব্যক্তিৰ মৃত্যু

যোৰহাট জিলাৰ টীয়ক সমষ্টিৰ লাহদৈগড় আৰক্ষী চকীৰ অন্তৰ্গত মেলেং চাহ বাগিচাত শুকুৰবাৰে নিশা বনৰীয়া হাতীৰ আক্ৰমণত দামু প্ৰধান(৫০) নামৰ এজন ব্যক্তিৰ শোকাবহ মৃত্যু হোৱা ঘটনাই সমগ্ৰ অঞ্চলটোত শোকৰ ছাঁ পেলাইছে l

জানিব পৰা মতে, মৰিয়নিৰ গিবন অভয়াৰণ্যৰ পৰা ওলাই অহা এটা বনৰীয়া হাতীৰ জাকে দীৰ্ঘদিন ধৰি অঞ্চলটোত সন্ত্ৰাসৰ সৃষ্টি কৰি আহিছিল l শুকুৰবাৰে নিশা হঠাৎ অহা এটা বন্যহস্তী দলৰ আক্ৰমণতে দুখজনকভাৱে মৃত্যুক আকোৱালি লয় দুৰ্ভগীয়া দামু প্ৰধানে।

বনৰীয়া হাতীৰ আক্ৰমণত মৃত্যু হোৱা দামু প্ৰধানৰ ঘৰ মেলেং চাহ বাগিচাৰ সমীপত।

নিশা বনৰীয়া হাতীৰ জাকটোৱে ঘৰৰ ভিতৰত প্ৰৱেশ কৰি পঞ্চাশোৰ্ধৰ ব্যক্তিজনক হত্যা কৰে।

আনহাতে সমগ্ৰ বিষয়টোত বন বিভাগৰ বিষয়া- কৰ্মী  নিৰ্দিষ্ট সময়ত উপস্থিত নোহোৱাৰ লগতে প্ৰয়োজনীয় ব্যৱস্থা গ্ৰহণ নকৰাৰ অভিযোগ উত্থাপন কৰিছে স্থানীয় ৰাইজে।

দীৰ্ঘসময়ৰ পৰা অঞ্চলটোত বনৰীয়া হাতীৰ উপদ্ৰৱৰ বিষয়ে বন বিভাগক জনাই অহাৰ পাছতো বন বিভাগে কোনোধৰণৰ প্ৰতিৰোধমূলক ব্যৱস্থা গ্ৰহণ নকৰা বাবেই এনেধৰণৰ দুৰ্ঘটনা সংঘটিত হয় বুলি স্থানীয় লোকে সংবাদ মাধ্যমৰ আগত কয়।