মুম্বাইত বৰদিন পালন কৰিবলৈ গৈ অ’টোৰিক্সা চালকৰ ধৰ্ষণৰ বলি এগৰাকী ১৮ বছৰীয়া যুৱতী

মুম্বাইত বৰদিন আৰু নতুন বছৰ পালন কৰিবলৈ গৈ ছত্তিশগড় এগৰাকী ১৮ বছৰীয়া যুৱতী ধৰ্ষণৰ বলি হ’বলগীয়া হৈছে।

যোৱা ২৭ ডিচেম্বৰত ২৬ বছৰীয়া এজন অ’টোৰিক্সা চালকে যুৱতীগৰাকীক নিৰ্জন ঠাইলৈ নি ধৰ্ষণ কৰে বুলি আৰক্ষীয়ে প্ৰকাশ কৰিছে।

ইতিমধ্যে যুৱতীগৰাকীৰ অভিযোগৰ ভিত্তিত আৰক্ষীয়ে অভিযুক্ত অ’টোৰিক্সা চালকজনক গ্ৰেপ্তাৰ কৰিছে।

আৰক্ষীয়ে প্ৰকাশ কৰা খবৰ অনুসৰি ছত্তিশগড় নিৱাসী যুৱতীগৰাকীয়ে বৰদিন আৰু নতুন বছৰ পালন কৰিবলৈ যোৱা ২২ ডিচেম্বৰত মুম্বাই উপস্থিত হৈছিল।

ইয়াৰ পিছতে যুৱতীগৰাকীয়ে মহাৰাষ্ট্ৰ বিভিন্ন এলেকা পৰিভ্ৰমণ কৰে। ২৭ ডিচেম্বৰত যুৱতীগৰাকীয়ে এখন অ’টোৰিক্সাৰেৰে পানভেলৰ পৰা গান্ধী গাৰ্ডেনলৈ গৈ আছিল।

চালকজনে গান্ধী গাৰ্ডেনলৈ নিয়াৰ পৰিৱৰ্তে ৱাদঘৰ নদীৰ পাৰৰ এক নিৰ্জন ঠাইলৈ নি যুৱতীগৰাকীক ধৰ্ষণ কৰাৰ লগতে এটা শীলেৰে মূৰত আঘাত কৰি আহত কৰে বুলিও যুৱতীগৰাকীয়ে এজাহাৰত উল্লেখ কৰা বুলি আৰক্ষীয়ে প্ৰকাশ কৰিছে।

ইয়াৰ পিছতে পানভেল আৰক্ষী থানাৰ আৰক্ষীয়ে বাৰ্ৱাই গাঁৱৰ পৰা অভিযোগৰ ১২ ঘণ্টাৰ ভিতৰতে অভিযুক্ত চালকগৰাকীক গ্ৰেপ্তাৰ কৰে বুলি সংবাদ মাধ্যমক সদৰী কৰিছে থানাৰ আৰক্ষী বিষয়া অজয়কুমাৰ লাণ্ডেজে।

আৰক্ষীয়ে ঘটনাৰ সন্দৰ্ভত ভাৰতীয় দণ্ডবিধি আইনৰ ৩৭৬ আৰু ৫০৬-২ ধাৰাত গোচৰ ৰুজু কৰি অভিযুক্তক জেইল হাজোতলৈ প্ৰেৰণ কৰিছে।