পদ পথত ফল বিক্ৰী কৰি জীৱন নিৰ্বাহ কৰিছে PHD ডিগ্ৰীধাৰী মহিলাই, কিন্তু কিয়?
মহিলা গৰাকীৰ নাম ৰাইছা আনচাৰী। ৩৬ বছৰীয়া এইগৰাকী মহিলাৰ মুখত অনৰ্গল ফুটে শুদ্ধ ইংৰাজী। মহিলা গৰাকীৰ ইংৰাজী কোৱাৰ ধৰণে সকলোকে আচৰিত কৰি আহিছে।
কিছুদিন পূৰ্বে ৰাইছা আনচাৰী নামৰ এই গৰাকী মহিলাই ইংৰাজী কোৱাৰ ভিডিঅ’ ছ’চিয়েল মিডিয়াত ভাইৰেল হোৱাৰ পিছতে সকলোৰে আকৰ্ষণৰ কেন্দ্ৰ বিন্দু হৈ পৰিছে মহিলা গৰাকী।
ৰাইছা আনচাৰীৰ আছে এক দুখৰ অতীত। ইণ্ডোৰৰ এই গৰাকী মহিলাই ইণ্ডোৰৰ দেৱী অহল্যা বিশ্ব বিদ্যালয়ৰ পৰা মেটেৰিয়েল ছায়েন্স বিষয়ত লাভ কৰিছিল পি এইছ ডি ডিগ্ৰী।
মাজতে তেওঁ এখন অভিযান্ত্ৰিক মহাবিদ্যালয়ত অধ্যাপনাৰ কামো কৰিছিল।
ৰাইছা আনচাৰীৰ জীৱনলৈ এদিন এটা সুবৰ্ণ সুযোগ আহিছিল। বেলজিয়ামলৈ তেওঁ আমন্ত্ৰিত হৈছিল গৱেষণাৰ বাবে। কিন্তু ভাগ্যই যেন তেওঁক লগ দিয়া নাছিল।
এই সুযোগ অহাৰ পূৰ্বে তেওঁ কলকাতাৰ আই আই এছ ই আৰলৈ গৈছিল আন এক গৱেষণাৰ বাবে। একে সময়তে লাভ কৰিছিল চি এছ আই আৰৰ ফেল’শ্বিপো।
বেলজিয়ামলৈ আমন্ত্ৰিত হোৱাত তেওঁ তালৈ যোৱাৰেই সিদ্ধান্ত লৈছিল। কিন্তু ৰাইছাই ভবা মতে কামবোৰ নহ’ল। তেওঁৰ পি এইছ ডি গাইডে তেওঁক প্ৰয়োজনীয় নথি-পত্ৰত চহী কৰি দিবলৈ অসন্মত হ’ল।
ফলত মনৰ আশা নিৰ্বাপিত হ’ল ৰাইছাৰ। আশাহত ৰাইছাই কলকাতাৰ পৰা উভতি আহি ইণ্ডোৰত ঘৰৰ পৰম্পৰাগত ফলৰ ব্যৱসায়ত ধৰিলে।
সেই দিন ধৰি তেওঁ ফলৰ ব্যৱসায়ে কৰি আছে।
লক্ষ্যণীয় কথাটো হ’ল ২০০৪ চনতে পি এইছ ডিৰ বাবে পঞ্জীয়ন লাভ কৰা ৰাইছাক পি এইছ ডি দিয়া হ’ল ২০১১ চনতহে।
কাৰোৱাৰ আক্ৰোশৰ বলি হোৱা ৰাইছাৰ মনত এতিয়া ক্ষোভৰ জুই। দেৱী অহল্যা বিশ্ব বিদ্যালয়ৰ প্ৰাক্তন উপাচাৰ্য আশুতোষ মিশ্ৰই কয়, ‘ৰাইছা খুব মেধাবী আছিল। তেওঁৰ ক্ষেত্ৰত হয়তো কোনোবাই ক’ৰবাত কিবা ভুল কৰিলে’।