ক’ৰ’না পৰীক্ষাগাৰৰ পৰা ওলোৱা ভাইৰাছ নহয়; পুনৰ চীনক ৰক্ষণাবেক্ষণ বিশ্ব স্বাস্থ্য সংস্থাৰ

বিশ্ব স্বাস্থ্য সংস্থাই শেহতীয়াভাৱে ক’ৰ’না ভাইৰাছৰ সন্দৰ্ভত পুনৰ চীনৰ পক্ষ গ্ৰহণ কৰিছে।

বৰ্তমানলৈ মজুত থকা সকলো ধৰণৰ তথ্যৰ ভিত্তিত ক’ৰ’না ভাইৰাছ পৰীক্ষাগাৰত বনোৱা নহয়, জীৱ জন্তুত প্ৰথম পোৱা গৈছে বুলি প্ৰমাণ হৈছে বুলি বিশ্ব স্বাস্থ্য সংস্থাই মঙলবাৰে উল্লেখ কৰে।

‘‘ক’ৰ’না ভাইৰাছ সাধাৰণতে বাদুলীৰ শৰীৰত থাকে কিন্তু এই ভাইৰাছ কেনেদৰে বাদুলীৰ পৰা মানুহলৈ বিয়পি পৰিল সেই সন্দৰ্ভত এতিয়াও স্পষ্ট তথ্য আৰু প্ৰমাণ পোহৰলৈ অহা নায়,’’ বিশ্ব স্বাস্থ্য সংস্থাৰ মুখপাত্ৰ ফেডেলা চাইবে কয়।

উল্লেখযোগ্য যে, ক’ৰ’না ভাইৰাছৰ সংক্ৰমণ সন্দৰ্ভত আমেৰিকা যুক্তৰাষ্ট্ৰৰ ৰাষ্ট্ৰপতি ড’নাল্ড ট্ৰাম্পে চীনৰ প্ৰতি সন্দেহৰ আঙুলি টোৱাইছে।

আমেৰিকাৰ উপৰিও ফ্ৰাঞ্চ, য়ুনাইটেড কিংদমকে ধৰি বহুকেইখন ৰাষ্ট্ৰই চীনত ক’ৰ’না ভাইৰাছ কেনেদৰে সংক্ৰমিত হ’ল সেই সন্দৰ্ভত সন্দেহ ব্যক্ত কৰিছে।

ৰাষ্ট্ৰপতি ট্ৰাম্পে ক’ৰ’না ভাইৰাছৰ সংক্ৰমণ সন্দৰ্ভত বিশ্ব স্বাস্থ্য সংস্থাই চীনৰ পক্ষ লোৱা বুলি প্ৰথমৰ পৰা অভিযোগ কৰি আহিছে।

জাপানেও বিশ্ব স্বাস্থ্য সংস্থাক ইয়াৰ নাম সলনি কৰি য়ুহান স্বাস্থ্য সংস্থা ৰাখিবলৈ পৰামৰ্শ দিছিল।