বিশ্বৰ প্ৰথম হেড ট্ৰান্সপ্লান্ট চিষ্টেম; ভাইৰেল গ্রাফিক ভিডিঅ’ দেখি চকু থৰ নেটিজেনৰ
হেড ট্ৰান্সপ্লান্ট অৰ্থাৎ মূৰ প্ৰতিস্থাপন! শুনি আচৰিত যেন লাগিলেও সঁচা। এই ব্যৱস্থা আমেৰিকাৰ স্নায়ুবিজ্ঞান আৰু জৈৱ চিকিৎসা অভিযান্ত্ৰিক সংস্থা ব্ৰেইনব্ৰিজে কৰিছে। এই সংস্থাটোৱে বিশ্বৰ প্ৰথমটো মূৰ সংৰোপণৰ কাম আৰম্ভ কৰিবলৈ ওলাইছে।
ছচিয়েল মিডিয়াত ভাইৰেল হৈছে এটা গ্রাফিক ভিডিঅ’। হেড ট্ৰান্সপ্লাণ্টৰ সকলো তথ্য এই ভিডিঅ’টোৰ জৰিয়তে দিয়া হৈছে। কোনো মানৱ চিকিৎসকে এই জটিল অস্ত্ৰোপচাৰ কৰা দেখা যোৱা নাই। একাধিক চাৰ্জেক্লল ৰবটে এজনৰ মূৰ আন এজনৰ শৰীৰত প্ৰতিস্থাপন কৰি আছে।
এই ভিডিঅ’টোক লৈ এতিয়া ছচিয়েল মিডিয়াত তোলপাৰ লাগিছে। এইদৰে এজন ব্যক্তিৰ মূৰ সংৰোপণৰ জৰিয়তে জীয়াই ৰখাটো সম্ভৱ হ’ব নেকি তাকলৈয়ো বিতৰ্ক আৰম্ভ হৈছে।
🤖 BrainBridge, the first head transplant system, uses robotics and AI for head and face transplants, offering hope to those with severe conditions like stage-4 cancer and neurodegenerative diseases… pic.twitter.com/7qBYtdlVOo
— Tansu Yegen (@TansuYegen) May 21, 2024
ব্ৰেইনব্ৰিজ সংস্থাটোৰ মতে মূৰ সংৰোপণৰ প্ৰৱৰ্তন হ’লে কেন্সাৰ, পক্ষাঘাত, এলঝেইমাৰ, পাৰ্কিনছন আদি দুৰাৰোগ্য ৰোগত আক্ৰান্ত লোকক নতুন জীৱন দিয়া সম্ভৱ। উন্নত প্ৰযুক্তি আৰু বৈজ্ঞানিক পদ্ধতি ব্যৱহাৰ কৰি মূৰ প্ৰতিস্থাপন ব্যৱস্থা আৰম্ভ কৰা হৈছে।
যেতিয়া এজন সুস্থ ব্যক্তিৰ মগজু বিকল (ব্ৰেইন ডেড) হৈ পৰে তেতিয়া পৰিয়ালৰ সন্মতি সাপেক্ষে মৃত্যুমুখী ৰোগীৰ শৰীৰত মূৰ প্ৰতিস্থাপন কৰিব পৰা যায়। গ্ৰাফিক ভিডিঅ’টোত দেখা গৈছে যে মূৰটো ডিঙিৰ পৰা কাটি আন এটা শৰীৰত ট্ৰান্সপ্লাণ্ট কৰা হৈছে। এই অস্ত্ৰোপচাৰ ৰবটবোৰে সহজেই কৰি আছে।
ভাৰতকে ধৰি কেইবাখনো দেশত অংগ প্ৰতিস্থাপন জনপ্ৰিয় হৈ পৰিছে। কিন্তু এতিয়ালৈকে কোনো দেশত মূৰ সংৰোপণ বা হেড ট্ৰান্সপ্লান্ট কৰা হোৱা নাই। এইবাৰ আমেৰিকাত দেখা যাব পাৰে চিকিৎসাৰ নতুন পদ্ধতি। কিন্তু বহুতে মূৰ সংৰোপণক লৈ প্ৰশ্ন উত্থাপন কৰিছে। এই পদ্ধতিৰে মৃত্যুমুখত পৰা মানুহ এজনক নতুন জীৱন দিয়াটো নৈতিকভাৱে সঠিক নেকি সেই বিষয়ে বহু বিতৰ্কৰ সৃষ্টি হৈছে।