আবু ধাবিত টি-১০ প্ৰতিযোগিতাত চমক দিবলৈ সাজু ছিক্সাৰ কিং যুৱৰাজ সিং

ভাৰতৰ প্ৰাক্তন তাৰকা ক্ৰিকেটাৰ যুৱৰাজ সিং পুনৰ সাজু হৈছে মধ্য প্ৰাশ্চ্যত অনুষ্ঠিত হ’বলগীয়া টি-১০ খেলত নিজৰ পৰাক্ৰম দেখুৱাবলৈ। যুৱৰাজ সিঙক মাৰাঠা আৰবিয়ানে নিজৰ আইকন খেলুৱৈ হিচাপে দলত অন্তৰ্ভূক্ত কৰিছে।

১৪ নৱেম্বৰৰ পৰা অনুষ্ঠিত হ’বলগীয়া প্ৰতিযোগিতাখনৰ বাবে ইতিমধ্যে আই চি চিয়ে স্বীকৃতি প্ৰদান কৰিছে।

বিগত জুনত আন্তঃৰাষ্ট্ৰীয় ক্ৰিকেটৰ পৰা অৱসৰ গ্ৰহণ কৰা ৩৭ বছৰীয়া যুৱৰাজ সিঙৰ বাবে এয়া দ্বিতীয় ফ্ৰেঞ্চাইজি আধাৰিত প্ৰতিযোগিতা হ’ব।

তাৰকা ক্ৰিকেটাৰগৰাকীয়ে ভাৰতীয় দলে ২০০৭ চনৰ টি-২০ বিশ্বকাপ আৰু ২০১১ চনৰ এদিনীয়া বিশ্বকাপ জয় কৰাৰ ক্ষেত্ৰত গুৰুত্বপূৰ্ণ ভুমিকা পালন কৰিছিল।

আন্তঃৰাষ্ট্ৰীয় ক্ৰিকেটৰ পৰা সন্যাস গ্ৰহণৰ পাছত যুৱৰাজ সিঙে জুলাই-আগষ্ট মাহত কানাডাত অনুষ্ঠিত হোৱা গ্লোৱেল টি-২০ প্ৰতিযোগিতাত অংশগ্ৰহণ কৰিছিল আৰু প্ৰতিযোগিতাখনত তেওঁ টৰেণ্ট’ জাতীয় দলৰ অধিনায়ক আছিল।

উল্লেখযোগ্য যে, মাৰাঠা আৰবিয়ানে অলপতে জিম্বাবুৱেৰ প্ৰাক্তন অধিনায়ক এণ্ডি ফ্লাৱাৰক দলৰ মুখ্য প্ৰশিক্ষক হিচাপে নিযুক্তি দিছে। এণ্ডি ফ্লাৱাৰ ইংলেণ্ডৰো প্ৰশিক্ষক হিচাপে কাম কৰিছিল।

টি-১০ প্ৰতিযোগিতাখনৰ বিষয়ে মন্তব্য প্ৰকাশ কৰি যুৱৰাজ সিঙে প্ৰতিযোগিতাখনত ভাগলোৱাৰ বাবে উৎসুক হৈ আছে বুলি কয়।