অগপত শব্দৰ আকাল! প্ৰেছ বিবৃতি ‘নকল’ কৰি দিয়ে ফে’চবুক প’ষ্ট

অসম গণ পৰিষদে তেওঁলোকৰ ফে’চবুক পেইজত দিয়া এটা প’ষ্টক কেন্দ্ৰ কৰি তীব্ৰ প্ৰতিক্ৰিয়া ব্যক্ত কৰিছে সাংবাদিক সংগঠন ‘যুৱ সাংবাদিক সন্থা, অসমে’।

উল্লেখযোগ্য যে ‘যুৱ সাংবাদিক সন্থা, অসমে’ অহা বছৰৰ ৯ ফ্ৰেব্ৰুৱাৰীত অনুষ্ঠিত কৰিবলৈ লোৱা সংগঠনটোৰ দ্বিতীয় বাৰ্ষিক প্ৰতিষ্ঠা দিৱস আৰু বিশেষ সম্বৰ্ধণা অনুষ্ঠানৰ সন্দৰ্ভত যোৱা ২০ নবেম্বৰত সংবাদ মাধ্যমলৈ এখন প্ৰেছ বিবৃতি জাৰি কৰিছিল।

কিন্তু উক্ত প্ৰেছ বিবৃতিটোৰ প্ৰথম তিনিটা বাক্য অসম গণ পৰিষদে ‘হুবহু নকল কৰি’ কালি অৰ্থাৎ ১ ডিচেম্বৰত অসম গণ পৰিষদৰ ফেচবুক পেইজত এটা পষ্টত দিয়ে বুলি যুৱ সাংবাদিক সন্থাই অভিযোগ আনে।

বাক্য কেইটা হৈছে – ‘যুৱ শক্তি এক অদম্য শক্তি ৷ যি শক্তিৰ উদ্যোগ আৰু সু-সংগঠিত, সংহতিগত চিন্তাই দেশ মাতৃ আৰু উত্তৰণৰ ঢাপত অৰিহনা যোগায়। উন্নয়নৰ সকলো পৰিসৰত যুৱ দক্ষতাৰ অৱদান অপৰিহাৰ্য্য। ৰাজনীতিৰ ক্ষেত্ৰখনত যুৱ নেতাসকলৰ অৱদান অপৰিহাৰ্য্য।’

পিছত প’ষ্টটো যুৱ সাংবাদিক সন্থাৰ নেতৃবৰ্গৰ দৃষ্টিগোচৰ হোৱাত তীব্ৰ প্ৰতিক্ৰিয়া প্ৰকাশ কৰি তেওঁলোকে কয়, ‘জ্ঞান নেথাকিলে ৰাজনীতি কৰিব নেলাগে, কিন্তু আনৰ সৃষ্টিৰাজি শব্দভাণ্ডাৰক হুবহু নকল কৰিব নেলাগে।’

লগতে সংগঠনটোৰ লেখা ভৱিষ্যতে যদি কোনো দুষ্ট চক্ৰই অনুমতি অবিহনে নকল কৰে তেন্তে প্ৰয়োজনত যুৱ সাংবাদিক সন্থাই আইনৰ কাষ চাপিবলৈও বাধ্য হ’ব বুলি কয়।