বঙাইগাঁও জিলাৰ কোকিলাত মোডী,জেটলিৰ পুত্তলিকা দাহ : চৰকাৰ বিৰোধী ধ্বনিৰে যুৱ কংগ্ৰেছৰ উত্তাল প্ৰতিবাদ
আজি বঙাইগাঁও জিলা আৰু উত্তৰ অভয়াপুৰী সমষ্টি যুৱ কংগ্ৰেছৰ উদ্যোগত মনাকছা বজাৰত এক প্ৰতিবাদী কাৰ্যসূচী ৰূপায়ন কৰা হয়। তেওঁলোকে প্ৰধানমন্ত্ৰী নৰেন্দ্ৰ মোডী আৰু বিত্তীয়মন্ত্ৰী অৰুণ জেটলিৰ পুত্তলিকা দাহ কৰি এই প্ৰতিবাদ সাব্যস্ত কৰে।
প্ৰতিবাদস্থলীত প্ৰতিবাদকাৰীসকলে বিজেপি চৰকাৰ হায় হায়, বিজেপি চৰকাৰ মুৰ্দাবাদ, নৰেন্দ্ৰ মোডী মুৰ্দাবাদ, অৰুণ জেটলি মুৰ্দাবাদ, সৰ্বানন্দ সোণোৱাল মুৰ্দাবাদ, সাধাৰণ জনতাৰ পকেট মাৰি খাইছে মোডী মালীয়াই, যুৱ কংগ্ৰেছ জিন্দাবাদ আদি শ্লোগানেৰে প্ৰতিবাদস্থলী উত্তাল কৰি তোলে।
হাতে হাতে প’ষ্টাৰ, প্লে’ কাৰ্ড লৈ বিজেপি চৰকাৰক কৰ্পোৰেট গোষ্ঠীৰ ৰক্ষক বুলি অভিহিত কৰাৰ লগতে নিৰৱ মোডী, বিজয় মালিয়া, ললিত মোডীৰ দৰে লোকে ভাৰতবৰ্ষৰ পৰা কোটি কোটি টকা সৰকাই লৈ বিদেশত আৰামত দিন কটাইছে বুলিও যুৱ কংগ্ৰেছ কৰ্মীসকলে মন্তব্য কৰে।
সাধাৰণ জনতাই মূৰৰ ঘাম মাটিত পেলাই জমা থোৱা ধন কেইজনমান ধনকুবেৰে ঋণ হিচাপে লৈ পৰিশোধ নকৰি বিদেশলৈ পলাই গৈ বিলাসী জীৱন যাপন কৰি আছে বুলি মন্তব্য কৰি প্ৰতিবাদকাৰীসকলে সেইসকল ব্যক্তিৰ লগত বিজেপি চৰকাৰৰ মিতিৰালি থকাৰো অভিযোগ কৰে।
ইফালে কৃষকে কৃষি ঋণ পৰিশোধ কৰিব নোৱাৰি আত্মহত্যা কৰিব লগা হৈছে বুলি উল্লেখ কৰি তেওঁলোকে কয় যে ইয়াৰ বিপৰীতে বিজয় মালিয়া, নিৰৱ মোডী, ললিত মোডী তথা কৰ্পৰেটগোষ্ঠীৰ লগত বিজেপি চৰকাৰৰ মিতিৰালিৰ থকাৰ ইংগিত পোৱা গৈছে আৰু ইয়াৰ সুবিধা গ্ৰহণ কৰি তেওঁলোকে ৰাইজৰ ধন লুণ্ঠন কৰিছে।
বিজয় মালিয়াক পলাই যাবলৈ চৰকাৰে সহযোগ কৰা বুলি সদৰী কৰি যুৱ কংগ্ৰেছৰ নেতাসকলে কয় যে যোৱাৰ সময়ত মালিয়াই ভাৰতবৰ্ষৰ বিত্ত মন্ত্ৰী অৰুণ জেটলিক সাক্ষাৎ কৰিছিল আৰু এই সকলো কথা অৰুণ জেটলিৰ অৱগত।
বিজেপিয়ে নিৰ্বাচনৰ আগত যি প্ৰতিশ্ৰুতি দিছিল তাৰ এটাও পালন কৰিব পৰা নাই বুলি অভিযোগ তুলি প্ৰতিবাদকাৰীসকলে বিজেপি চৰকাৰক মিছলীয়া চৰকাৰ বুলি আখ্যা দিয়ে। যুৱ কংগ্ৰেছৰ কৰ্মকৰ্তাসকলে এই পুত্তলিকা দাহৰে বিজেপি চৰকাৰ আৰু কৰ্পোৰেটগোষ্ঠীৰ মাজত থকা সম্পৰ্ক পুৰি ছাৰখাৰ কৰিলে বুলি মন্তব্য কৰে।