বঙাইগাঁৱত অনলাইন ক্ৰিকেট বেটিং জুৱা ,চাৰিজনক গ্ৰেপ্তাৰঃ উদ্ধাৰ নগদ ধন, মোবাইল 

বঙাইগাঁও জিলাৰ বিভিন্ন অঞ্চলত বিশেষকৈ গাঁও অঞ্চলত অবাধ হাৰত  চলিছে অন লাইন ক্ৰিকেট বেটিং জুৱা ৷ যাৰ বাবে বহু  লোক সৰ্বস্বান্ত হ’বলগীয়া হৈছে ৷ এই অনলাইন ক্ৰিকেট বেটিং জুৱাত পুৰুষৰ লগতে মহিলায়ো ভাগ লোৱাত হৈছে সৰ্বস্বান্ত ৷

এই তথ্য প্ৰকাশ কৰিছে বঙাইগাঁও জিলাৰ উপ আৰক্ষী অধীক্ষক লুণা সোনোৱালে ৷ উপ আৰক্ষী অধীক্ষক গৰাকীয়ে সংবাদ মাধ্যমৰ আগত প্ৰকাশ কৰা মতে মোৱাইলত ফেন কোড আৰু ক্ৰিকেট লাইভ নামৰ দুটা এপৰ জৰিয়তে এই অনলাইন ক্ৰিকেট বেটিং জুৱা অনুষ্ঠিত হয় ৷

চেইন চিষ্টেমত চলোৱা হয় এই  অনলাইন বেটিং জুৱা ৷ একৰ পৰা শূন্য নম্বৰৰ ভিতৰত শেষ নম্বৰ ভিত্তিত চলে এই জুৱা ৷

জুৱাত ভাগ লোৱাসকলে এই এপ দুটাৰ জৰিয়তে ক্ৰিকেট খেল চায় আৰু বেটচমেনৰ স্কোৰ তথা মুঠ স্কোৰ আদিৰ শেষ নম্বৰৰ ওপৰত বেটিং কৰে অৰ্থাৎ বাজী লগায় ৷

এইক্ষেত্ৰত ৱাটচএপৰ জৰিয়তে অনলাইন বেটিং জুৱাত ভাগ লোৱাসকলে জুৱা অনুষ্ঠিত কৰাসকলৰ সৈতে গোটেই প্ৰক্ৰিয়াটো চলাই যায় ৷ ১০ টকা ধৰিলে নম্বৰ মিলিলে ৯০ টকা লাভ কৰে ৷

ধন লাভ কৰাসকলে পিছত নিজে জুৱা অনুষ্ঠিত কৰাসকলৰ পৰা ধন সংগ্ৰহ কৰে ৷ এই অনলাইন ক্ৰিকেট বেটিং জুৱাৰ বিৰুদ্ধে বঙাইগাঁও জিলাৰ এটি আৰক্ষীৰ দলে শনিবাৰে নিশা এক অভিযান চলাই  চাৰি জন অনলাইন ক্ৰিকেট বেটিং জুৱাৰীক গ্ৰেপ্তাৰ কৰে ৷

এক নিৰ্দিষ্ট খবৰৰ ভিত্তিত বঙাইগাঁও জিলাৰ উপ আৰক্ষী অধীক্ষক লুণা সোনোৱালৰ নেতৃত্বত বঙাইগাঁও সদৰ থানাৰ ভাৰপ্ৰাপ্ত আৰক্ষী বিষয়া উপেন কলিতা, মাণিকপুৰ থানাৰ ভাৰপ্ৰাপ্ত আৰক্ষী বিষয়া , বঙাইগাঁও থানাৰ নগৰ উপ পকিদৰ্শকসহ আৰক্ষীৰ এটি দলে জিলাখনৰ মাণিকপুৰ থানাৰ অন্তৰ্গত অঞ্চলৰ পৰা এই চাৰিজন জুৱাৰীক আটক কৰে ৷

আৰক্ষীয়ে এই অনলাইন ক্ৰিকেট বেটিং জুৱাৰ সৈতে জড়িত থকাৰ অভিযোগত মাণিকপুৰৰ ২ নং নোৱাপাৰাৰ কৃষ্ণ মণ্ডল (৪২) , মৌখোৱাৰ আকিব হুছেইন(২৭) , ডোমপাৰাৰ দেবানন পাঠক (২১) আৰু গজেন ৰায়( ২৪) ক আটক কৰে ৷

আৰক্ষীয়ে এই চাৰিজনৰ পৰা নগদ ৫১ হেজাৰ টকা , তিনিটা মোবাইল ফোন আৰু দুখন তথ্য সন্নিবিষ্ট থকা বহী উদ্ধাৰ কৰে৷

উপ আৰক্ষী অধীক্ষকগৰাকীয়ে এই অনলাইন বেটিং জুৱাৰ পৰা সকলোকে আতৰি থাকিবলৈ আহ্বান জনাই এনে অনলাইন জুৱা বা সি কোনো জুৱা চলি থকাৰ বিষয়ে জানিলে ৰাইজক আৰক্ষীক অৱগত কৰাৰ বাবেও আহ্বান জনাইছে  ৷

ইপিনে আৰক্ষীয়ে পিছত চাৰিওজনকে গ্ৰেপ্তাৰ কৰে আৰু দেওবাৰে আদালতত হাজিৰ কৰোৱাত আদালতে চাৰিওজনকে জেল হাজতলৈ প্ৰেৰণ কৰে৷