জিম্বাবুয়েৰ পাকিস্তান ভ্ৰমণত যোৱাৰ অনুমতি নাপালে দলটোৰ ভাৰতীয় প্ৰশিক্ষকে

ভাৰত-পাকিস্তানৰ মাজত চলি থকা কূটনৈতিক সম্পৰ্কৰ অৱনতিৰ বাবে দুয়োখন দেশৰ মাজত বিগত কেইবছৰ ধৰি দ্বিপাক্ষিক ছিৰিজ বন্ধ হৈ আছে।

ইপিনে, ২০২১চনত ভাৰতত অনুষ্ঠিত হ’বলগীয়া টী-২০ বিশ্বকাপত যাতে ভিছাৰ কোনো সমস্যা নহয় তাৰবাবে পাকিস্তানে আইচিচিৰ ওচৰত আবেদনো জনাইছে।

বিচিচিআইয়ে অৱশ্যে পাকিস্তানৰ এনে অমূলক ধাৰাণাক গুৰুত্ব দিব খোজা নাই।

আনহাতে, কৰ’না পৰিস্থিতিৰ শাম কটাৰ পাছতে পাকিস্তানে দেশৰ মাটিত জিম্বাবুয়েৰ বিপক্ষে আন্তৰ্জাতিক ক্ৰিকেটলৈ প্ৰত্যাৱৰ্তন কৰিব।

পাকিস্তানৰ বিপক্ষে খেলিবলগীয়া ছিৰিজটোৰ বাবে জিম্বাবুয়ে দলৰ সৈতে যাবলগীয়া ইয়াৰ মুখ্য প্ৰশিক্ষক লালচান্দ ৰাজপুতক অনুমতি দিয়া হোৱা নাই।

ভাৰতৰ প্ৰাক্তন ক্ৰিকেটাৰ গৰাকীক আগন্তুক ছিৰিজৰ পৰা অব্যাহতি দিবলৈ জিম্বাবুয়ে ক্ৰিকেট বোৰ্ডক ভাৰতীয় দূতাবাসে অনুৰোধ জনাইছে।

জিম্বাবুয়ে ক্ৰিকেট বোৰ্ডে এক আনুষ্ঠানিক বিবৃতিত এই কথা সদৰী কৰিছে।

উল্লেখ্য যে ২০০৭ চনত টী-২০ বিশ্বকাপ বিজয়ী ভাৰতীয় দলটোৰো প্ৰশিক্ষক আছিল। ভাৰতীয় প্ৰশিক্ষক গৰাকীৰ অনুপস্থিতিত দলটোৰ বলিং প্ৰশিক্ষক ডগলাছ হোণ্ডোই ছৰিজিটোত জিম্বাবুয়েৰ ভাৰপ্ৰাপ্ত মুখ্য প্ৰশিক্ষকৰ দায়িত্ব গ্ৰহণ কৰিব।

পাকিস্তান দূতাবাসে ৰাজপুতক অৱশ্যে ভিছা প্ৰদান কৰিছিল। কিন্তু ভাৰতীয় দূতাবাসে যিহেতু দেশখনৰ নাগৰিকসকলৰ পাকিস্তান ভ্ৰমণত নিষেধাজ্ঞা জাৰি কৰিছে, সেই কাৰণে তেওঁক অনুমতি দিয়া নহ’ল।