চিকিৎসালয়ৰ পৰা ওলাল জুবিন; খাৰঘূলিৰ পৰিৱৰ্তে মুম্বাইলৈ ৰাওনা

যোৱা ২৮ ফেব্ৰুৱাৰিৰ পৰা গুৱাহাটীৰ নেমকেয়াৰ হাস্পতালত চিকিৎসাধীন হৈ থকা যুৱ প্ৰজন্মৰ হাৰ্টথ্ৰৱ জুবিন গাৰ্গ সম্পূৰ্ণ সুস্থ হৈ উঠা বাবে আজি তেওঁক হাস্পাতলৰ পৰা যাবলৈ দিয়া হয়।

শিল্পীজনে নেমকেয়াৰ হাস্পাতালৰ পৰা পোনে পোনে মুম্বাইলৈ ৰাওনা হয়। জুবিনৰ লগত মুম্বাইলৈ গৈছে গৰিমা গাৰ্গ।

জুবিন সম্পূৰ্ণ সুস্থ হৈ উঠা বুলি জানিবলৈ দি পৰিয়ালৰ লোকে জনায়, ‘কালি নিজেই নিজৰ দাঢ়ি কাটিছে জুবিনে। কেইদিনমান তাত অকলশৰে কটাই পুনৰ অসমলৈ ঘূৰি আহিব’।

জুবিনে মুম্বাইৰ আন্ধেৰিস্থিত নিজা বাসগৃহত থাকিব বুলি জানিব পৰা গৈছে।

জুবিনে চিকিৎসালয় এৰাৰ পিছত সাংবাদিকে তেওঁৰ স্বাস্থ্যৰ বিষয়ে চিকিৎসালয়ৰ স্বত্তাধিকাৰী হিতেশ বৰুৱাক সোধাত জুবিন সুস্থ হৈ উঠা বুলি মন্তব্য কৰে।

ইফালে প্ৰিয় শিল্পীগৰাকীয়ে সুস্থ হৈ উঠি আজি চিকিৎসালয় এৰিব বুলি জানিব পাৰি অনুৰাগীসকলে পুৱাৰে পৰাই চিকিৎসালয় চৌহদত ভিৰ কৰা পৰিলক্ষিত হয়।