জুবিন হত্যাকাণ্ড: ২৮ এপ্ৰিলত হ’ব সিদ্ধাৰ্থ শৰ্মাৰ জামিন আবেদনৰ শুনানি
জুবিন হত্যাকাণ্ডৰ অভিযুক্ত সিদ্ধাৰ্থ শৰ্মাৰ জামিন আবেদনৰ পৰৱৰ্তী শুনানিৰ বাবে ফাষ্ট ট্ৰেক আদালতৰ বিচাৰক শৰ্মিলা ভূঞাই অহা ২৮ এপ্ৰিলৰ দিনটো ধাৰ্য কৰিছে। শুকুৰবাৰে আদালতত এই সন্দৰ্ভত শুনানি গ্ৰহণ কৰা হৈছিল যদিও চৰকাৰী পক্ষক তেওঁলোকৰ উত্তৰ দাখিল কৰিবলৈ অতিৰিক্ত সময় দিয়া হয়। বিশেষ চৰকাৰী অধিবক্তা জিয়াউল কামৰে জামিন আবেদনৰ বিৰোধিতা কৰি যুক্তি প্ৰদৰ্শনৰ বাবে আদালতৰ ওচৰত অধিক সময় বিচাৰিছিল আৰু তাৰ পাছতে আদালতে শুনানি স্থগিত ৰাখি ২৮ এপ্ৰিললৈ পিছুৱাই দিয়ে। উল্লেখ্য যে কামৰে বৰ্তমান নগাঁও আদালতত চলি থকা অভি-নীল হত্যাকাণ্ডৰ গোচৰটোতো অসম চৰকাৰক প্ৰতিনিধিত্ব কৰি আছে।
জানিব পৰা মতে নগাঁও জিলা সত্ৰ আদালতত শুকুৰবাৰে অভি-নীল হত্যাকাণ্ডৰ ৰায়দান হোৱাৰ লগতে দোষীক শাস্তি প্ৰদানৰ প্ৰক্ৰিয়া চলি থকাৰ পৰিপ্ৰেক্ষিতত অধিবক্তাগৰাকীয়ে কিছু সময় বিচাৰিছিল। সেই অনুৰোধ বিবেচনা কৰি বিচাৰকে সিদ্ধাৰ্থ শৰ্মাৰ জামিনৰ গোচৰটো ২৮ এপ্ৰিলত শুনিম বুলি জনায়।
ইফালে শুকুৰবাৰৰ আন দুই অভিযুক্ত নন্দেশ্বৰ বৰা আৰু পৰেশ বৈশ্যৰ বিৰুদ্ধে অভিযোগ গঠনৰ সমৰ্থনত চৰকাৰী পক্ষই যুক্তি আগবঢ়ায়। লিগেল চাৰ্ভিচেছ অথৰিটিৰ জৰিয়তে অভিযুক্তক প্ৰতিনিধিত্ব কৰা প্ৰতিৰক্ষা পক্ষৰ অধিবক্তাসকলেও নিজৰ যুক্তি শেষ কৰিছে। আদালতে অভিযোগ গঠনৰ সন্দৰ্ভত চৰকাৰী পক্ষৰ পৰৱৰ্তী যুক্তি শুনাৰ বাবে ২৭ এপ্ৰিলৰ দিনটো স্থিৰ কৰিছে।