মুম্বাইৰ পৰা পত্নী-সতীৰ্থসহ অসম আহি পালেহি জুবিন গাৰ্গ; ১৪ দিন থাকিব কোৱাৰেন্টাইনত

মুম্বাইৰ পৰা অসম আহি পালেহি জুবিন গাৰ্গ। সোমবাৰে মাজনিশা প্ৰায় ২:৩০ বজাত সৰুসজাইত উপস্থিত হয় জনপ্ৰিয় কণ্ঠশিল্পী গৰাকী।

তেওঁৰ পত্নী গৰিমা শইকীয়া গাৰ্গ আৰু অন্য দুজন সহযোগীৰে সৈতে জুবিন আহি সৰুসজাইত উপস্থিত হয়।

এতিয়া ১৪ দিনৰ বাবে কোৱাৰেন্টাইনত থাকিব জুবিন গাৰ্গ আৰু সহযোগীসকল।

হোটেল ৰেডিচন ব্লুত কোৱাৰেন্টাইনত থাকিব জুবিন গাৰ্গ সহ চাৰিওজনে।

সৰুসজাই ষ্টেডিয়ামত উপস্থিত হোৱাৰ পাছত প্ৰথমে চাৰিওজনৰ স্ক্ৰীনিং কৰা হয়।

ইয়াৰ পাছত কিছুসময় জিৰণি লৈ পোনে পোনে ৰাওনা হয় হোটেল ৰেডিচন ব্লুলৈ।

ইপিনে, স্বাস্থ্য মন্ত্ৰী ডঃ হিমন্ত বিশ্ব শৰ্মাৰ পৰিশ্ৰমৰ শলাগ লয় জুবিন আৰু পত্নী গৰিমা শইকীয়া গাৰ্গে।

জুবিন গাৰ্গে কয় “হিমন্ত দাই খুব ভাল কাম কৰি আছে। তেওঁক ধন্যবাদ দিবই লাগিব। আমাক অহাৰ ক্ষেত্ৰতো তেওঁ সহায় কৰি দিছে।”

“অসমৰ ৰাইজক সজাগ কৰিব লাগিব। ১৫ দিন মই বৰ অস্থিৰতাত আছো, কেতিয়া অসম গৈ পাম তেনেকুৱা লাগিছিল। ৰাইজৰ কাৰণে কাম কৰিম সেইকাৰণে আহিছো,”- অসমবাসী ৰাইজক উদ্দেশ্যি জুবিনে কয়।

আনহাতে, গৰিমা শইকীয়া গাৰ্গে কয়, “অসমৰ মুখ্য মন্ত্ৰী আৰু স্বাস্থ্য মন্ত্ৰীক অশেষ ধন্যবাদ। অসমৰ ৰাইজৰ কাৰণে তেওঁলোকে যিখিনি কাম কৰি আছে সেয়া সঁচাই প্ৰশংসনীয়। তেওঁলোকে আমি কৰা আবেদন শুনিলে।”

উল্লেখযোগ্য যে, যোৱা ৮ মে ৰ দিনা মুম্বাইৰ পৰা যাত্ৰা আৰম্ভ কৰিছিল তেওঁলোকে। পাঁচ দিনৰ মূৰত আহি অসমত উপস্থিত হয়হি তেওঁলোক।