সততে কঠোৰতাই তেওঁলোকৰ পৰিচয় বুলি ধৰা হয় যদিও আৰক্ষীৰ লোকসকলো মানুহ। মানৱতা তেওঁলোকৰো প্ৰধান আধাৰ। খাকী পোচাকৰ মাজতে লুকাই থাকে এই মানৱতা৷ তাৰে দৃষ্টান্ত দাঙি ধৰিলে কৃষ্ণাইৰ কেইজনমান খাকী পোচাকধাৰী জোৱানে।
আইন-শৃংখলা নিয়ন্ত্ৰণৰ দায়িত্বৰ মাজতো বিগত চাৰি মাহ ধৰি এওঁলোককেইজন ব্যস্ত হৈছে এজন অসহায়, অচিনাকি লোকৰ সেৱা-শুশ্ৰূষাত৷ এফালে চাকৰিৰ দায়িত্ব আনফালে পৰিচয়বিহীন অসহায় লোকৰ চিকিৎসা –দুয়োটাৰ মাজত সমন্বয় ৰক্ষা কৰিব লগীয়া হৈছে।
এবাৰ যদি এই কেও-কিছু নোহোৱা লোকজনক চিকিৎসাৰ বাবে গোৱলপাৰা অসমৰিক চিকিৎসালয়ত লৈ যায় আকৌ চিকিৎসালয় কৰ্তৃপক্ষৰ কথামতে লৈ যায় গুৱাহাটীৰ চিকিৎসা মহাবিদ্যালয়লৈ৷
গুৱাহাটীৰ চিকিৎসা মহাবিদ্যালয় কৰ্তৃপক্ষই আকৌ ৰোগীক গোৱালপাৰাত ৰাখিবলৈহে পৰামৰ্শ দিয়ে৷ গতিকে দোমোজাত পৰে আৰক্ষীৰ জোৱানকেইজন।
ঘটনাটো আৰম্ভ হৈছিল ১৮ মে’ ২০১৮ তাৰিখতে। উক্ত দিনা স্থানীয় লোকৰ অভিযোগৰ ভিত্তিত কৃষ্ণাইৰ জ্যোতি নগৰৰ পৰা কৃষ্ণাই আৰক্ষী থানাৰ ভাৰপ্ৰাপ্ত বিষয়া টুবুল বড়োসহ আৰক্ষীৰ দল এটাই আঘাতপ্ৰাপ্ত অৱস্থাত উদ্ধাৰ কৰিছিল পৰিচয়বিহীন এজন লোকক।
তাৰ পৰাই আৰম্ভ হ’ল কৃষ্ণাই আৰক্ষীৰ এই ধৰ্মসংকট৷ অৱশ্যে কৃষ্ণাইৰ আৰক্ষীয়ে ইয়াক প্ৰত্যাহ্বান হিচাপে লৈ মানৱতাৰ বিৰল নিদৰ্শন স্থাপন কৰিবলৈ সক্ষম হৈছে৷ কৰ্তব্যৰ খাতিৰত ঘৰ-পৰিয়াল পৰা আঁতৰত থাকি ৰোগীক শুশ্ৰূষা কৰাত ব্যস্ত আৰক্ষী থানাখনৰ কেইবাজনো আৰক্ষী৷ ইব্ৰাহিম, আখিৰুল, মনছেৰ, ৰাজু ৰাভা, অপূ শৰ্মা, জাকিৰ হুছেইন, আব্দুল আৰু মজিবৰ আলী -এওঁলোকৰ হাতত এতিয়া নাই বন্দুক-বাৰুদ। এওঁলোক এতিয়া গুৱাহাটীৰ চিকিৎসা মহাবিদ্যালয়ত অসহায় লোকজনৰ শুশ্ৰূষা কৰাত ব্যস্ত৷ খোৱা-বোৱাৰ লগতে ৰোগীগৰাকীৰ মল-মূত্ৰও নিতৌ পৰিষ্কাৰ কৰিব লগা হয় তেওঁলোকে।
জানিব পৰা মতে, ১৯ মে’ত আঘাতপ্ৰাপ্ত লোকজনক আৰক্ষীয়ে ভৰ্তি কৰিছিল গোৱালপাৰাৰ অসামৰিক চিকিৎসালয়ত৷ প্ৰথম অৱস্থাত ডেৰ মাহ সময় গোৱালপাৰাৰ অসামৰিক চিকিৎসালয়ত ৰোগীগৰাকীক ৰখা হৈছিল যদিও চিকিৎসালয় কৰ্তৃপক্ষই প্ৰতি মুহূৰ্ততে ৰোগীজনক লৈ যাবলৈ জোৰ কৰিছল৷
অভিভাৱকহীন এই ৰোগীজনক ক’ত ৰাখিব আৰক্ষীয়ে, যাৰ নাই কোনো ঠিকনা, নাই কোনো পৰিয়াল-পৰিজন? চিকিৎসালয় কৰ্তৃপক্ষক বহু কাকূতি-মিনতি কৰিও বিফল হ’ল কৃষ্ণাই আৰক্ষী৷
ইফালে চিকিৎসালয় কৰ্তৃপক্ষই ৰোগীজনক চিকিৎসালয়ৰ পৰা আঁতৰাই পঠিওৱাৰ বাবে আদালতৰ কাষ চাপে আৰু আদালতৰ নিৰ্দেশ অনুসৰি অসহায় ৰোগীজনক প্ৰেৰণ কৰা হয় গুৱাহাটীৰ চিকিৎসা মহাবিদ্যালয়লৈ৷ আকৌ বিড়ম্বনাই দেখা দিলে আৰক্ষীৰ বাবে। এদিনতে ৰোগীক ৰিলিজ কৰিলে চিকিৎসা মহাবিদ্যালয় কৰ্তৃপক্ষই৷
অসহায়-অচিনাকি লোকজনৰ লগত যোৱা আৰক্ষীকেইগৰাকী বৰ বিমোৰত পৰিল! ক’ত লৈ যাব এই লোকজনক? গোৱালপাৰাৰ পৰা উন্নত চিকিৎসাৰ বাবে আনিছিলহে মাত্ৰ৷
নিৰুপায় আৰক্ষী জোৱান ইব্ৰাহিম, অপু, ৰাজু, জাকিৰহঁতে চিকিৎসালয় কৰ্তৃপক্ষক হাতে-ভৰিয়ে ধৰি এটা সপ্তাহৰ চিকিৎসা মহাবিদ্যালয়ত ৰোগীজনক ৰাখিবলৈ খাটনি ধৰাত চিকিৎসালয় কৰ্তৃপক্ষ মান্তি হ’ল৷
এতিয়া এটা সপ্তাহত আতিক্ৰম কৰিবৰ হ’ল৷ আকৌ আহিল সংকটৰ সময়! কৃষ্ণাই আৰক্ষীয়ে কি কৰিব? ক’ত ৰাখিব অসহায় লোকজনক?
বিগত এই চাৰি মাহত আৰক্ষীয়ে চৰকাৰী-বেচৰকাৰী বহু আনুষ্ঠানৰ পৰা সহায়ৰ আশা কৰিছিল যদিও কোনো চৰকাৰী-বেচকাৰী সংস্থাই এই অসহায়-অচিনাকি লোকজনক আৰোগ্য কৰি তোলাৰ বাবে কিন্তু আগ বাঢ়ি নাহিল। আনকি এটকাও নাপালে চৰকাৰৰ পৰাও৷
বিগত চাৰি মাহে কৃষ্ণাই আৰক্ষী থানাৰ বিষয়া তথা জোৱান সকলোৱে মিলি এতিয়ালৈকে দৰমহাৰ এটা শকত পৰিমাণৰ ধন ব্যয় কৰিব লগা হৈছে অসহায় ৰোগীজনৰ চিকিৎসাৰ বাবত৷
খাকী পোচাক পিন্ধি হাতত বন্দুক আইন-শৃংখলা ৰক্ষাৰ সমান্তৰালভাৱে এই আৰক্ষীৰ জোৱানকেইজনে দায়িত্ব লৈছে অচিনাকি ৰোগাক্ৰান্ত লোকজনক সোনকালে সুস্থ কৰি তোলাৰ৷
