অবৈধ নিযুক্তি লাভ কৰা নাৰ্ছক বৰ্খাস্তৰ নিৰ্দেশ ন্যায়ালয়ৰ
ৰাজ্যৰ স্বাস্থ্য বিভাগৰ এ এন এম নাৰ্ছে অবৈধভাৱে নিযুক্তি লাভ কৰাৰ গুৰুতৰ অভিযোগ উত্থাপন হৈ অহাৰ সময়তে শেহতীয়াকৈ গুৱাহাটী উচ্চ ন্যায়ালয়ে জাৰি কৰিছে গুৰুত্বপূৰ্ণ নিৰ্দেশ। এ এন এম নাৰ্ছ নিযুক্তিৰ সমগ্ৰ বিষয়টোত উচ্চ ন্যায়ালয়ে হস্তক্ষেপ কৰি অবৈধ নিযুক্তিপ্ৰাপ্ত সকলো এ এন এম নাৰ্ছৰ চাকৰি বৰ্খাস্ত কৰাৰ নিৰ্দেশ জাৰি কৰিছে।
লক্ষণীয়ভাৱে অবৈধভাৱে নিযুক্তি হোৱাৰ সম্পূৰ্ণ তথ্য পৰ্যবেক্ষণ কৰিহে উক্ত নাৰ্ছসকলক বৰ্খাস্ত কৰাৰ নিৰ্দেশ দিয়াৰ লগতে ইয়াৰ দ্বাৰা খালী হোৱা পদসমূহত যোগ্যতাৰ ভিত্তিত বঞ্চিত আবেদনকাৰী প্ৰাৰ্থীক নিযুক্তি প্ৰদানৰ নিৰ্দেশ জাৰি কৰে ন্যায়ালয়ে। কেইবাগৰাকী বঞ্চিত নাৰ্ছ প্ৰাৰ্থীয়ে দাখিল কৰা আবেদনৰ ভিত্তিতে চূড়ান্ত শুনানি গ্ৰহণ কৰি উচ্চ ন্যায়ালয়ৰ ন্যায়াধীশ হৃষিকেশ ৰয়ৰ বিচাৰপীঠে এই গুৰুত্বপূৰ্ণ ৰায় জাৰি কৰে।
স্মৰ্তব্য যে ২০১৩ চনৰ ১৬ নৱেম্বৰত স্বাস্থ্য বিভাগে ৮৩৫ টা এ এন এম পদৰ নিযুক্তিৰ বাবে বিজ্ঞাপন প্ৰকাশ কৰিছিল আৰু ২০১৫ চনৰ ১৩ অক্টোবৰত এই পদকেইটাত নিযুক্তি প্ৰক্ৰিয়াও সম্পূৰ্ণ কৰি তুলিছিল। কিন্তু লগে লগেই এই নিযুক্তিৰ সমগ্ৰ প্ৰক্ৰিয়াত ব্যাপক অনিয়ম সংঘটিত হোৱা বুলি অভিযোগ উত্থাপন হোৱাৰ লগতে এই লৈ উচ্চ ন্যায়ালয়তো গোচৰো ৰুজু কৰা হয়।
উক্ত গোচৰৰ ভিত্তিতেই ৰায় প্ৰদান কৰি শেহতীয়াকৈ অবৈধভাৱে নিযুক্ত নাৰ্ছক বৰ্খাস্তৰ নিৰ্দেশ দিয়ে ন্যায়ালয়ে। লগতে কোনো নাৰ্ছক বৰ্খাস্ত কৰাৰ পূৰ্বে অবৈধ নিযুক্তিপ্ৰাপ্ত হয় নে নহয় তাক ভালদৰে পৰীক্ষা নিৰীক্ষা কৰাৰো নিৰ্দেশ দিয়ে ৰাজ্য চৰকাৰক।
আনহাতে উপযুক্ত জাননী প্ৰদান কৰিহে কোনো নাৰ্ছক বৰ্খাস্ত কৰাৰ নিৰ্দেশ দিয়াৰ লগতে এইসমূহ পদত নিযুক্তি প্ৰদানৰ বাবে আদালতত আবেদনকাৰী প্ৰাৰ্থীসকলৰ যোগ্যতা বিবেচনা কৰিবলৈ নিৰ্দেশ জাৰি কৰে ন্যায়ালয়ে।