অসমত আৰু অনুষ্ঠিত নহয় টেট পৰীক্ষা
অসম চৰকাৰে ঘোষণা কৰিছে যে চলিত বৰ্ষৰ পৰা ৰাজ্যত মধ্য ইংৰাজী (M.E) শিক্ষকৰ যোগ্যতা পৰীক্ষা (TET) পৰীক্ষা অনুষ্ঠিত নহয়।
সূত্ৰ অনুসৰি ৰাজ্যৰ শিক্ষা বিভাগে গুৱাহাটী উচ্চ ন্যায়ালয়ক অৱগত কৰে যে ৰাজ্যত আৰু এম ই টেট পৰীক্ষা অনুষ্ঠিত নহয়।
অৱশ্যে এই সন্দৰ্ভত উচ্চ ন্যায়ালয়ে কোনো নিৰ্দেশ বা নিৰ্দেশনা জাৰি কৰা নাই।
চলিত বৰ্ষৰ জানুৱাৰী মাহত অসম চৰকাৰে জনাইছিল যে আগন্তুক দুবছৰলৈ ৰাজ্যত টেট অনুষ্ঠিত কৰা নহয়।
অসমৰ শিক্ষামন্ত্ৰী ৰানোজ পেগুৱে কয় যে উপলব্ধ খালী পদৰ বিপৰীতে বহু পৰীক্ষাৰ্থীয়ে টেট পৰীক্ষাত উত্তীৰ্ণ হোৱা বাবেই এই সিদ্ধান্ত লোৱা হৈছে।
পেগুৱে কয়, ‘CTET ৰ অৰ্হতাসম্পন্ন প্ৰাৰ্থীয়ে এই বছৰৰ পৰা ৰাজ্য চৰকাৰৰ শিক্ষক পদৰ বাবে আবেদন কৰিব পাৰিব।
ইফালে, সদৌ অসম ছাত্ৰ সন্থাৰ সম্পাদক শংকৰ জ্যোতি বৰুৱাই উল্লেখ কৰে যে ইতিমধ্যে ৰাজ্যত হাজাৰ হাজাৰ ছাত্ৰ–ছাত্ৰীয়ে বিএড উত্তীৰ্ণ কৰি টেটৰ জৰিয়তে সংস্থাপন লাভ কৰাৰ সপোন দেখিছে।
ইতিমধ্যে বহু চাকৰি প্ৰাৰ্থী পৰীক্ষাৰ বাবে সাজু হৈছে আৰু তেওঁলোকৰ বাবে ই বিপৰ্যয়জনক হ’ব বুলি উল্লেখ কৰি চৰকাৰক তেওঁলোকৰ সিদ্ধান্তৰ পুনৰ মূল্যায়ন কৰিবলৈ আহ্বান জনাইছে আছুৰ সম্পাদক গৰাকীয়ে।