অসম আন্দোলনৰ বৰ্ষীয়ান অসুস্থ নেতালৈ ৰাজ্য চৰকাৰৰ সাহায্যৰ হাত

অসম আন্দোলনৰ বৰ্ষীয়ান নেতা তথা বিশিষ্ট সমাজকৰ্মী খনীন্দ্ৰ চন্দ্ৰ দাসলৈ ২ লাখ টকাৰ আৰ্থিক সাহায্য আগবঢ়াইছে অমৰ মুখ্য মন্ত্ৰী সৰ্বানন্দ সোণোৱালে।

প্ৰবীণ নেতাগৰাকী বৰ্তমান গুৱাহাটীৰ যোৰাবাটত থকা নৰ্থ ইষ্ট কেঞ্চাৰ হস্পিটালত চিকিৎসাধীন হৈ আছে।

মুখ্য মন্ত্ৰীৰ সংবাদ মাধ্যম উপদেষ্টা হৃষিকেষ গোস্বামীয়ে অসুস্থ নেতাগৰাকীক চিকিৎসালয়ত সাক্ষাত কৰি তেওঁৰ হাতত মুখ্য মন্ত্ৰী সাহায্য পুঁজিৰ ১ লাখ টকাৰ চেকখন অৰ্পণ কৰে। মুখ্য মন্ত্ৰীৰ কৰ্যালয়ৰ পৰা প্ৰকাশিত এটা বিজ্ঞপ্তিত এই কথা প্ৰকাশিত হৈছে।

উল্লেখ্য যে প্ৰায় ইয়াৰ দুমাহ পূৰ্বেও ৰাজ্য চৰকাৰৰ তৰফৰ পৰা এইগৰাকী বিশিষ্ট সমাজকৰ্মীৰ হাতত ১ লাখ টকাৰ চেক প্ৰদান কৰা হৈছিল।

প্ৰবীণ নেতাগৰাকীৰ স্বাস্থ্যৰ বুজ লোৱাৰ সময়ত মুখ্য মন্ত্ৰীৰ সংবাদ মাধ্যম উপদেষ্টা গৰাকীয়ে সমাজ জীৱনলৈ খনীন্দ্ৰ চন্দ্ৰ দাসৰ অসামান্য বৰঙণিৰ কথা উল্লেখ কৰে আৰু পৰৱৰ্তী চিকিৎসাৰ ক্ষেত্ৰত ভৱিষ্যতে আৰু আৰ্থিক সাহায্য আগবঢ়োৱাৰ আশ্বাস দিয়ে।

অসুস্থ নেতাগৰাকীয়ে তেওঁৰ জীৱনৰ এই কঠিন সময়ত  তেওঁলৈ আগবঢ়োৱা আৰ্থিক সহায় আৰু অনুকম্পাৰ বাবে মুখ্য মন্ত্ৰীগৰাকীক ধন্যবাদ জনায়।

উল্লেখ্য যে অসম আন্দোলনৰ এগৰাকী আগশাৰীৰ নেতা হোৱাৰ উপৰিও খনীন্দ্ৰ চন্দ্ৰ দাস কেন্দ্ৰীয় আৰু অৰ্ধ কেন্দ্ৰীয় কৰ্মচাৰী সন্থাৰ সৈতে বহু দশক জুৰি সক্ৰিয়ভাৱে জড়িত হৈ আছে।