অসম চৰকাৰৰ পৰা নিহত বা নিৰুদ্দিষ্ট সাংবাদিকৰ বৰ্তমান স্থিতিৰ প্ৰতিবেদন বিচাৰিছে প্ৰেছ কাউন্সিল অফ্ ইণ্ডিয়াই

প্ৰেছ কাউন্সিল অফ্ ইণ্ডিয়াই অসম চৰকাৰৰ পৰা ৰাজ্যখনত নিহত বা নিৰুদ্দিষ্ট সাংবাদিকৰ ঘটানাসমূহৰ বৰ্তমান স্থিতিৰ প্ৰতিবেদন বিচাৰিছে।

কাউন্সিলৰ অধ্যক্ষ চন্দ্ৰমৌলি কুমাৰ প্ৰসাদে বিষয়টোৰ গুৰুত্ব গ্ৰহণ কৰি ৰাজ্যখনত হত্যাৰ বলি হোৱা বা নিৰুদ্দিষ্ট হৈ থকা ৩২ টা ঘটনাৰ তদন্তৰ ক্ষেত্ৰত গতি লেহেমীয়া হোৱাৰ অভিযোগ সম্পৰ্কত প্ৰতিবেদন বিচাৰিছে।

অসমৰ মুখ্যমন্ত্ৰী সৰ্বানন্দ সোণোৱালে ৩২ গৰাকী সাংবাদিকৰ পৰিয়াললৈ ৫ লাখ টকাৰ এক কালীন সাহায্য আগবঢ়োৱাৰ পিছতে প্ৰেছ কাউন্সিলে এই পদক্ষেপ গ্ৰহণ কৰিছে। এই ৩২ গৰাকী সাংবাদিকক বিগত তিনি দশকত হত্যা কৰা হৈছিল কিম্বা নিৰুদ্দিষ্ট হৈছিল।

এই সম্পৰ্কত এটা বিবৃতি জাৰি কৰি প্ৰেছ কাউন্সিল অফ্ ইণ্ডিয়াই কৈছে, ‘’ বিগত তিনি দশকত অসমত হত্যাৰ বলি হোৱা বা নিৰুদ্দিষ্ট হোৱা সাংবাদিকৰ ৩২ টা গোচৰৰ তদন্ত প্ৰক্ৰিয়া বিলম্ব হোৱাৰ প্ৰতিবেদন সম্পৰ্কত চিন্তা ব্যক্ত কৰি অধ্যক্ষ চন্দ্ৰমৌলি কুমাৰ প্ৰসাদে বিষয়টোৰ গুৰুত্ব গ্ৰহণ কৰি অসমৰ মুখ্য সচিব আৰু আৰক্ষী সঞ্চালক প্ৰধানৰ পৰা বৰ্তমান স্থিতি সম্পৰ্কত প্ৰতিবেদন বিচাৰিছে।‘’

২০১৫ চনত তেওঁলোকলৈ প্ৰেৰণ কৰা সাংবাদিকৰ সুৰক্ষা বিষয়ক কমিটিৰ পৰামৰ্শাৱলীৰ ভিত্তিত গ্ৰহণ কৰা কাৰ্য ব্যৱস্থাৰ প্ৰতিবেদন দাখিল কৰিবলৈকো নিৰ্দেশ দিয়া হৈছে। প্ৰেছ কাউন্সিল অফ্ ইণ্ডিয়াৰ বিবৃতিত এই কথা প্ৰকাশ পাইছে।