অৰুণাচল প্ৰদেশত এভাৰেষ্ট অভিযানৰ শুভাৰম্ভ মুখ্য মন্ত্ৰী পেমা খাণ্ডুৰ

অৰুণাচল প্ৰদেশৰ পশ্চিম চিয়াং জিলাৰ নিমাছ (National Institute of Mountaineering and Allied Sports) চৌহদৰ পৰা আজি বুধবাৰে এক মাউণ্ট এভাৰেষ্ট যাত্ৰাৰ শুভাৰম্ভ কৰে মুখ্য মন্ত্ৰী পেমা খাণ্ডুৱে।

নিমাছৰ সঞ্চালক কৰ্নেল চৰ্ফৰাজ সিঙৰ নেতৃত্বত যোৱা ১০ জনীয়া দলটোৱে এই মাহত বিশ্বৰ সৰ্বোচ্চ শৃংগ আৰোহণৰ প্ৰচেষ্টা চলাব।

প্ৰতিষ্ঠানটোৰ ব্যক্তিসকলৰ লগতে ডিৰাঙৰ দুজন স্থানীয় যুৱকো অভিযানকাৰী দলটোত আছে।

মুখ্য মন্ত্ৰীজনে আজি দলটোৰ সদস্যসকলক লগ কৰি অভিযানৰ সফলতা কামনাৰে শুভেচ্ছা জনায়।

উল্লেখযোগ্য যে ৰাজ্যখনৰ মুখ্য মন্ত্ৰী আৰু তদানীন্তন প্ৰতিৰক্ষা মন্ত্ৰী অৰুন জেটলিৰ মাজত হোৱা এক বৈঠকত প্ৰতিৰক্ষা মন্ত্ৰ্যালয়ে এই অভিযানটোৰ অনুমোদন জনাইছিল।

এভাৰেষ্ট যাত্ৰা উদ্বোধনৰ পিছত ইটানগৰৰ হিমালয় ইণ্টাৰনেশ্বনেল স্কুলৰ প্ৰশিক্ষাৰ্থীসকলে নিমাছ চৌহদত থকা দেশৰ সৰ্বোচ্চ ক্লাইম্বিং টাৱাৰ (২২ মিটাৰ)টো বগায়।

সেনাবাহিনীৰ গঢ়ৱাল ৰাইফলছ আৰু নিমাছৰ ব্যক্তিয়ে বৰফ বগোৱা, খৰকে বগোৱাকে ধৰি বিভিন্ন শৈলীৰ পৰ্বতাৰোহণ প্ৰদৰ্শন কৰে।