আক্ৰাছুৰ অসম বন্ধত ঠায়ে ঠায়ে বিক্ষিপ্ত ঘটনা, ৰাজপথত টায়াৰ জ্বলাই প্ৰতিবাদ
আজি আক্ৰাছুৱে আহ্বান দিয়া ২৪ ঘণ্টীয়া অসম বন্ধত ৰাজ্যখনৰ ঠায়ে ঠায়ে বিক্ষিপ্ত ঘটনা সংঘটিত হোৱাৰ বাতৰি পোৱা গৈছে। আক্ৰাছুৰ বন্ধ সমৰ্থকে যান-বাহনলৈ শিলগুটি নিক্ষেপ কৰাৰ ঘটনা সংঘটিত হয়। বন্ধ সমৰ্থকৰ শিল নিক্ষেপৰ ফলত বহুকেইখন যান-বাহন ক্ষতিগ্ৰস্ত হয়।
গোৱালপাৰাৰ দুধনৈ আৰু ৰংজুলিত ৩৭ নং ঘাইপথত বন্ধৰ সমৰ্থকসকলে টায়াৰ জ্বলাই প্ৰতিবাদ সাব্যস্ত কৰে। ইপিনে জাগীৰোড আৰু মৰিগাঁৱতো বন্ধৰ সমৰ্থকসকলে ৰাজপথত টায়াৰ জ্বলাই প্ৰতিবাদ সাব্যস্ত কৰা বুলি জানিব পৰা গৈছে। আক্ৰাছুৰ কৰ্মীসকলৰ লগতে বন্ধৰ সমৰ্থকসকলে চৰকাৰ বিৰোধী ধ্বনি দি ৰাজপথ উত্তাল কৰি তোলে।
বিটিএডিতো আক্ৰাছুৰ ২৪ ঘণ্টীয়া অসম বন্ধৰ সৰ্বাত্মক প্ৰভাৱ পৰিলক্ষিত হৈছে। ধুবুৰীৰ তামাৰহাট, পাগলাহাট আৰু কুমাৰগঞ্জত বন্ধৰ ব্যাপক প্ৰভাৱ পৰিছে।
কোচ-ৰাজবংশীসকলক জনজাতিকৰণৰ দাবীৰ লগতে প্ৰস্তাৱিত পৃথক কমতাপুৰ ৰাজ্য গঠন কৰাৰ দাবীত আক্ৰাছু, মহিলা সমিতি আৰু চিলাৰায় সেনাই এই বন্ধৰ আহ্বান দিছে।
বিজেপি নেতৃত্বাধীন কেন্দ্ৰীয় আৰু ৰাজ্য চৰকাৰে কোচ ৰাজবংশীসকলক দিয়া প্ৰতিশ্ৰুতি বাৰে বাৰে ভংগ কৰি জনগোষ্ঠীটোৰ লগত প্ৰতাৰণা কৰাৰ অভিযোগ উত্থাপন কৰি আহিছে সদৌ অসম কোচ ৰাজবংশী ছাত্ৰ সন্থা চমুকৈ আক্ৰাছুৱে। চৰকাৰৰ এনে প্ৰতাৰণাৰ প্ৰতিবাদতে আজি ১২ ঘণ্টীয়া প্ৰস্তাৱিত কমতাপুৰ বন্ধৰ আহ্বান জনোৱা হৈছে।
শেহতীয়াভাৱে বড়ো সমস্যাক লৈ এবছুকে ধৰি বড়ো নেতৃত্বৰে নতুন দিল্লীত ত্ৰিপাক্ষিক বৈঠক অনুষ্ঠিত হৈ গৈছে। কিন্তু কোচ-ৰাজবংশীসকলৰ সমস্যাসমূহৰ প্ৰতি কেন্দ্ৰ তথা ৰাজ্য চৰকাৰে কোনো আগ্ৰহ নেদেখুৱাৰ অভিযোগ উত্থাপিত হৈছে।
আনহাতে, কোচ-ৰাজবংশীসকলৰ সমস্যাক লৈ আলোচনাৰ বাবে জনোৱা আমন্ত্ৰণ আক্ৰাছুৱে প্ৰত্যাখ্যান কৰিছে। জনজাতিকৰণৰ বিষয়টো আলোচনাত অন্তৰ্ভুক্ত নকৰাৰ বাবে আলোচনাত অংশ গ্ৰহণ নকৰাৰ সিদ্ধান্ত লৈছে আক্ৰাছুৱে।