আজি দাখিল কৰিব চহিদ আৰক্ষী বিষয়া ভাস্কৰ কলিতাৰ মৃত্যুৰ তদন্তৰ প্ৰতিবেদন

তিনিচুকীয়া জিলাৰ বৰডুমচা আৰক্ষী থানাৰ অন্তৰ্গত কুজুপথাৰত চি আৰ পি এফ আৰু আৰক্ষীৰে আলফা (স্বাঃ)ৰ চলা সংঘৰ্ষত চহিদ হোৱা বৰডুমচা আৰক্ষী থানাৰ ভাৰপ্ৰাপ্ত আৰক্ষী বিষয়া ভাস্কৰ কলিতাৰ মৃত্যুৰ তদন্তৰ প্ৰতিবেদন আজি দাখিল কৰিব।

চহিদ ভাস্কৰ কলিতাৰ মৃত্যুৰ তদন্ত কৰিবলৈ ৰাজ্য চৰকাৰে গঠন কৰি দিয়া তদন্তকাৰী বিষয়া সঞ্জয় কৃষ্ণই আজি ৰাজ্য চৰকাৰৰ মুখ্য সচিবৰ হাতত তদন্তৰ প্ৰতিবেদন দাখিল কৰিব।

উল্লেখ্য যে চহিদ আৰক্ষী বিষয়া ভাস্কৰ কলিতাই উগ্ৰপন্থীৰ সৈতে হোৱা সংঘৰ্ষৰ সময়ত পিন্ধা বুলেটপ্ৰুফ জেকেট অতি নিম্নমানৰ বুলি বিভিন্ন মহলত অভিযোগ উত্থাপন হোৱাৰ পাছতে ৰাজ্য চৰকাৰে সমস্ত ঘটনা সন্দৰ্ভত তদন্ত কৰিবলৈ নিৰ্দেশ দিছিল।

মে’ মাহৰ ৪ তাৰিখতে আলফা (স্বাঃ)ৰে হোৱা সংঘৰ্ষত বুলেট প্ৰুফ জেকেট ভেদি বুকুত গুলী লাগি প্ৰাণ আহুতি দিয়া বীৰ চহিদ আৰক্ষী বিষয়া ভাস্কৰ কলিতাৰ মৃত্যুৰ প্ৰায় ৩ মাহ পাছত আজি দাখিল কৰিবলগীয়া প্ৰতিবেদনত কি তথ্য প্ৰকাশ পায় সেয়া পৰৱৰ্তী সময়ত লক্ষ্যণীয় হ’ব।