আজি মে-দাম-মে-ফি : প্ৰথমবাৰৰ বাবে চৰকাৰৰ উদ্যোগত আন্তঃৰাষ্ট্ৰীয়ভাৱে উদযাপিত
আজি আহোমসকলৰ পূৰ্বপুৰুষ বা মৃত পুলিন-পুথাওসকলক সুঁৱৰি কৰা বছৰেকীয়া সমজুৱা সকাম মে-দাম মেফি। ৰাজ্যখনৰ বিভিন্ন ঠাইত আড়ম্বৰপূৰ্ণভাৱে এই সকাম পাতিছে সম্প্ৰদায়টোৰ লোকসকলে। আজিৰ দিনটোত সম্প্ৰদায়টোৰ মাজত প্ৰচলিত বিশ্বাস অনুসৰি পুলিন-পুথাওসকলক (তেওঁলোকৰ স্বৰ্গগত আত্মাক) আগ বঢ়োৱা হ’ব পূজা-অৰ্চনা।
বিগত বছৰবোৰৰ দৰে মে-দাম-মে-ফিত এইবাৰো পুলিন-পুথাওসকলক পূজা-অৰ্চনা আগ বঢ়োৱাৰ সমান্তৰালভাৱে লোৱা হৈছে বিভিন্ন সাংস্কৃতিক কাৰ্য্যসূচীও। আহোমসকলে নিজৰ ভাষা-সংস্কৃতিক পুনৰুজ্জীৱিত কৰিবলৈ চেষ্টা কৰি থকাৰ প্ৰয়াস এই কাৰ্য্যসূচীবোৰৰ মাজেৰে প্ৰতিফলিত হোৱা দেখা যায়।
আনহাতে এইবাৰ অসম চৰকাৰৰ সাংস্কৃতিক বিভাগে আন্তঃৰাষ্ট্ৰীয় মে-দাম-মে-ফি উদযাপন কৰিছে। এই উপলক্ষে মহানগৰস্থিত শ্ৰীমন্ত শংকৰদেৱ কলাক্ষেত্ৰত বৃহৎ পৰিসৰৰ কাৰ্য্যসূচী লোৱা হৈছে চৰকাৰৰ উদ্যোগত। ইয়াত বিদেশৰো প্ৰতিনিধি উপস্থিত থকাৰ কথা। চৰকাৰৰ সূত্ৰই জনোৱা মতে ইয়ালৈ থাইলেণ্ড, লাওচ আৰু ম্যানমাৰৰ পৰাও সাংস্কৃতিক দল আহিব আৰু কাৰ্য্যসূচী প্ৰদৰ্শন কৰিব। সাংস্কৃতিক অনুষ্ঠান পৰিৱেশিত হ’ব বিয়লি ৪-৩০ ৰ পৰা ৮-৩০ লৈ।
চৰকাৰৰ উদ্যোগত অনুষ্ঠিত আন্তঃৰাষ্ট্ৰীয় মে-দাম-মে-ফিত মুখ্য অতিথি হিচাপে মুখ্য মন্ত্ৰী সৰ্বানন্দ সোণোৱাল উপস্থিত থকাৰ লগতে ৰাজ্যৰ কেইবাজনো মন্ত্ৰী, বিধায়ক তথা সাংসদ উপস্থিত থাকিব। সন্মানীয় অতিথি হিচাপে নিমন্ত্ৰণ জনোৱা হৈছে ৰাজ্যৰ কেইবাজনো বিশিষ্ট সাংবাদিকক।