আৰক্ষী থানাসমূহত মুকলি কৰা হ’ব অভ্যৰ্থনা কক্ষ : ডিজিপি শইকীয়া
অসম আৰক্ষীৰ সঞ্চালক প্ৰধান কুলধৰ শইকীয়াই ঘোষণা কৰিছে যে গুৱাহাটী মহানগৰৰ পাঁচখন আৰক্ষী থানাত অভ্যৰ্থনা কক্ষ স্থাপন কৰা হ’ব।
শনিবাৰে গুৱাহাটীৰ নেডফি হাউছত আয়োজন কৰা তৃতীয় সংখ্যক উত্তৰ পূব জনসম্পৰ্ক বিষয়াৰ সন্মিলনত ভাষণ প্ৰদান কৰি আৰক্ষী সঞ্চালক প্ৰধান শইকীয়াই সকলোবোৰ চৰকাৰী আৰু ৰাজহুৱা খণ্ডৰ প্ৰতিষ্ঠানত জনসাধাৰণৰ সৈতে সৌহাৰ্দ্যপূৰ্ণ সম্পৰ্ক গঢ়াৰ ক্ষেত্ৰত জনসম্পৰ্ক ৰক্ষা ব্যৱস্থাৰ প্ৰয়োজনীয়তাৰ ওপৰত গুৰুত্ব আৰোপ কৰে।
সন্মিলনৰ আয়োজক পাব্লিক ৰিলেশ্যন ছচাইটি অৱ ইণ্ডিয়াৰ গুৱাহাটী শাখাৰ অধ্যক্ষ মধুছন্দা অধিকাৰীয়ে কয় যে অসম আৰক্ষীক ৰাইজৰ সৈতে বন্ধুত্বপূৰ্ণ সম্পৰ্ক গঢ়ি তোলাৰ প্ৰয়াসেৰে পাঁচখন থানাত অভ্যৰ্থনা কক্ষ স্থাপন কৰাৰ কথা ডিজিপি শইকীয়াই ঘোষণা কৰিছে।
তেওঁ কয় যে যিসময়ত ডিজিটেল প্ৰযুক্তিয়ে চৌব্বিশ ঘন্টাই গোটেই বিশ্বকে সম্পৰ্কিত কৰি ৰখাটো নিশ্চিত কৰিছে তেনে সময়তে ব্যক্তিৰ মাজত সম্পৰ্ক হ্ৰাস পোৱাটোৱে বৰ্তমান বিশ্বত অৱক্ষয় বৃ্দ্ধি পোৱাৰ এটা কাৰণ।
এই বছৰৰ সন্মিলনৰ মুল বিষয়বস্তু আছিল ‘জন সম্পৰ্ক-ভৱিষ্যত পন্থা।‘
দ্য আছাম ট্ৰিবিউন কাকতৰ কাৰ্যবাহী সম্পাদক পি জে বৰুৱাই তেওঁৰ মুখ্য অতিথিৰ ভাষণত কয় যে আমাৰ সমাজত দেখা দিয়া বহু সমস্যাৰ সন্তোষজনক সমাধান অনাত ভাল জন সম্পৰ্ক ৰক্ষা হৈছে প্ৰধান উপায়।
তেওঁ লগতে জনসম্পৰ্কৰক্ষী বৃত্তিধাৰীসকলে সংবাদ মাধ্যমৰ লগতে আন গুৰুত্বপূৰ্ণ প্ৰতিষ্ঠানসমূহৰ লগত সৌহাৰ্দ্যমূলক সম্পৰ্ক ৰক্ষা কৰাৰ প্ৰয়োজনীয়তাৰ ওপৰত গুৰুত্ব আৰোপ কৰে।
মধুছন্দা অধিকাৰীয়ে পাব্লিক ৰিলেশ্যন ছচাইটি অৱ ইণ্ডিয়াৰ গুৱাহাটী শাখাই অঞ্চলটোত জনসম্পৰ্ক ৰক্ষা বৃত্তিক আগবঢ়াই নিয়াৰ ক্ষেত্ৰত গ্ৰহণ কৰা কাৰ্যসূচীৰ ৰূপৰেখা দাঙি ধৰে।