ইতিহাস সৃষ্টি নেপাল ক্ৰিকেট দলৰ : পাপুৱা নিউ গিনিক পৰাস্ত কৰি আন্তঃৰাষ্ট্ৰীয় এদিনীয়া দলৰ মৰ্য্যাদা অৰ্জন
জিম্বাবোৱে’ত চলি থকা আই চি চি বিশ্বকাপ কোৱালিফায়াৰত পাপুৱা নিউ গিনিক পৰাস্ত কৰি আন্তঃৰাষ্ট্ৰীয় এদিনীয়া দলৰ মৰ্য্যাদা অৰ্জন কৰি ইতিহাস সৃষ্টি কৰিবলৈ সক্ষম হয় নেপাল ক্ৰিকেট দল।
উল্লেখযোগ্য যে নেপালে পাপুৱা নিউ গিনিক পৰাজিত কৰিবলৈ সক্ষম হ’লেও আন্তঃৰাষ্ট্ৰীয় মৰ্যাদা লাভ কৰিবলৈ ভৰসা কৰিব লগা হয় নেডাৰলেণ্ড আৰু হংকঙৰ মাজত অনুষ্ঠিত হোৱা খেলখনৰ ওপৰত। মেচখনত নেডাৰলেণ্ডে হংকঙক ৪৪ ৰানত পৰাস্ত কৰাৰ লগে লগে সুৰক্ষিত হয় নেপালৰ আন্তঃৰাষ্ট্ৰীয় এদিনীয়াৰ মৰ্যাদা।
জিম্বাবোৱে’ৰ পুৰণি হাৰাৰে ক্ৰিকেট ষ্টেডিয়ামত অনুষ্ঠিত হোৱা মেচখনত নেপালে ২৭.২ অভাৰতে প্ৰতিদ্বন্দ্বী পাপুৱা নিউ গিনিক মাত্ৰ ১১৪ ৰানতে অল আউট কৰে। নেপালৰ হৈ স্পীনাৰদ্বয় সন্দীপ লামিছানে আৰু দীপেন্দ্ৰ আয়ৰীয়ে চাৰিটাকৈ উইকেট দখল কৰে।
অলৰাউণ্ডাৰ দীপেন্দ্ৰ আয়ৰীৰ উজ্জ্বীৱিত প্ৰদৰ্শনৰ সহায়ত নেপাল দৰ্শনীয় বিজয় সাব্যস্ত কৰিবলৈ সক্ষম হয়। মেচখনত আয়ৰীয়ে চাৰিটা উইকেট লাভ কৰাৰ উপৰি আকৰ্ষণীয় ৫০ ৰানৰ এক ইনিংছো উপহাৰ দিয়ে।
ইয়াৰ উপৰি ১৭ বছৰীয়া লামীছানে আন্তঃৰাষ্ট্ৰীয় পৰ্যায়ত নেপালৰ হৈ পুনৰ এবাৰ উচ্চস্তৰীয় প্ৰদৰ্শন দাঙি ধৰে। মেচখনত লামীছানে ২৯ ৰান খৰচ কৰি দখল কৰে চাৰিটা উইকেট। তেওঁ প্ৰতিযোগিতাখনত মুঠ ১১ টা উইকেট দখল কৰিবলৈ সক্ষম হয়।
পি এন জিৰ বিপক্ষে অতি সহজ বিজয় সাব্যস্ত কৰি নেপালে আগন্তুক চাৰি বছৰৰ বাবে আন্তঃৰাষ্ট্ৰীয় এদিনীয়া আৰু ক্ৰিকেটৰ চমু সংস্কৰণ টি টুৱেণ্টিত নিজৰ মৰ্যাদা অৰ্জন কৰে।
ইয়াৰ উপৰি টেষ্ট ক্ৰিকেট নেখেলা আন্তঃৰাষ্ট্ৰীয় দলৰ মাজত অনুষ্ঠিত হ’বলগীয়া চাৰিদিনীয়া আন্তঃমহাদেশীয় টুৰ্নামেণ্টতো ভাগ লোৱাৰ সুযোগ লাভ কৰে। তদুপৰি ৱৰ্ল্ড ক্ৰিকেট লীগ চেম্পিয়নশ্বিপতো ভাগ ল’ব নেপালে।
‘আমাক উৎসাহ জনোৱাৰ বাবে সকলোকে ধন্যবাদ… বছৰ বছৰ ধৰি কৰি অহা কঠোৰ পৰিশ্ৰম, অধ্যৱসায়, উৎসৰ্গা আৰু প্ৰতিশ্ৰুতিৰ এয়া পৰিণাম। অৱশেষত আমি এদিনীয়া দল হিচাপে প্ৰতিষ্ঠিত হ’লো…নেপাল ক্ৰিকেটৰ লগত জড়িত হৈ অহা সকলোকে এই সুযোগতে ধন্যবাদ জ্ঞাপন কৰিলো’, সাফল্য অৰ্জন কৰাৰ পিছত টুইটাৰ যোগে এইদৰে কয় নেপাল ক্ৰিকেট দলৰ অধিনায়ক পাৰছ খাৰকাই।