উৰ্জা গংগা গেছ পাইপলাইন প্ৰকল্প গুৱাহাটীলৈকে সম্প্ৰসাৰণৰ পৰিকল্পনা গেইলৰ
ৰাষ্ট্ৰৰ মালিকানাধীন প্ৰতিষ্ঠান গেইলে (GAIL) ইয়াৰ উৰ্জা গংগা গেছ পাইপলাইন প্ৰকল্প গুৱাহাটীলৈকে সম্প্ৰসাৰণৰ পৰিকল্পনা কৰিছে। কেন্দ্ৰীয় পে’ট্ৰলিয়াম আৰু প্ৰাকৃতিক গেছ মন্ত্ৰী ধৰ্মেন্দ্ৰ প্ৰধানে কালি কয় যে এই পাইপলাইনে উত্তৰ-পূৰ্বাঞ্চলক দেশৰ গেছ গ্ৰিদৰ সৈতে সংযোগ কৰিব।
ফিকি (FICCI)ৰ এখন চেমিনাৰত ৰখা বক্তব্যত মন্ত্ৰীজনে কয় যে, ‘গেইলে জগদীশপুৰ হালদিয়া আৰু বোকাৰু ধামৰা পাইপলাইন গুৱাহাটীলৈকে সম্প্ৰসাৰিত কৰাৰ বাবে প্ৰস্তাৱ কৰিছে।’ তেওঁ লগতে কয় যে অনুমোদিত ১২৯৪০ কোটি টকাৰ প্ৰকল্প ব্যয়ৰ ভিতৰতে কোম্পানীটোৱে গুৱাহাটীলৈকে স্পাৰ লাইন বহুৱা সন্দৰ্ভত এটা সম্ভাৱনীয়াতা অধ্যয়নো (Feasibility Study) ইতিমধ্যে সম্পূৰ্ণ কৰিছে।
উত্তৰ-পূৰ্বাঞ্চলৰ ৰাজ্যকেইখনক ৰাষ্ট্ৰীয় গেছ গ্ৰিদৰ সৈতে সংযোগ কৰিব লগা স্পাৰ লাইন সন্দৰ্ভত অনুমতি বিচাৰি গেইলে পে’ট্ৰলিয়াম আৰু প্ৰাকৃতিক গেছ নিয়ামক ব’ৰ্ডৰ কাষ চাপিছে।
উল্লেখযোগ্য যে উত্তৰ-পূৰ্বাঞ্চলৰ ৭ খন ৰাজ্যক সংযোগ কৰি এক গেছ গ্ৰিদ গঠনৰ বাবে ৰাজহুৱা খণ্ডৰ ৫ টা প্ৰতিষ্ঠান গেইল, তেল আৰু প্ৰাকৃতিক গেছ নিগম, অইল আৰু ভাৰত পে’ট্ৰলিয়াম নিগম লিমিটেডে যুটীয়াভাৱে কাম কৰাৰ বাবে সিদ্ধান্ত কৰিছে। বিজনেছ ষ্টেনডাৰ্দৰ প্ৰতিবেদন অনুসৰি মন্ত্ৰী গৰাকীৰ মতে পাইপলাইন নোহোৱাৰ বাবে ত্ৰিপুৰা, মণিপুৰ, শিলচৰ আৰু অৰুণাচল প্ৰদেশত থকা গেছ ভাণ্ডাৰ সমূহৰ পৰা গেছ আহৰণ কৰি ব্যৱহাৰকাৰীলৈ যোগান ধৰিব পৰা হোৱা নাই।
উত্তৰ-পূৰ্বাঞ্চল গেছ গ্ৰিদ এতিয়াও ধাৰণাত্মক পৰ্যায়তে আছে।
এই পৰিৱেশ-অনুকূল ইন্ধনবিধৰ পৰিবাহী পাইপসমূহ ঘাইকৈ পশ্চিম আৰু উত্তৰ ভাৰততে থকাৰ বিপৰীতে ভাৰতৰ পূব প্ৰান্তত ইয়াৰ কোনো উপস্থিতি নাই। দক্ষিণ ভাৰতত কিছুমান পাইপলাইন বহুৱা হৈছে যদিও পূব ভাৰতত এতিয়ালৈকে ইয়াৰ কোনো ব্যৱস্থা কৰা হোৱা নাই।
ধৰ্মেন্দ্ৰ প্ৰধানে কয় যে কেন্দ্ৰীয় চৰকাৰে আজিও অৱহেলিত দেশৰ পূব অঞ্চলক উদীয়মান গেছ অৰ্থনীতিৰ সৈতে সংযুক্ত কৰোৱাৰ বাবে সিদ্ধান্ত লৈছে। ২৬৫৫ কি. মি. জোৰা উৰ্জা গংগা প্ৰকল্পৰ কাম ইতিমধ্যে আৰম্ভ হৈছে।