ছ’চিয়েল মিডিয়াত এইবাৰ অশোভনীয় মন্তব্য বিধায়িকা আঙুৰলতাৰ বিৰুদ্ধে : এজাহাৰ দাখিল

বিগত কিছুদিন ধৰি ছ’চিয়েল মিডিয়াত জনপ্ৰতিনিধিসকলৰ বিৰুদ্ধে আক্ৰমণ বৃদ্ধি পোৱাৰ লগতে অশোভনীয় মন্তব্যৰ ধুম উঠিছে। এই লৈ চৰকাৰ আৰু আৰক্ষী প্ৰশাসনে তৎপৰতাৰে ব্যৱস্থা ল’লেও ইয়াৰ প্ৰকোপ কমা নাই। ছ’চিয়েল মিডিয়াত বহুতে মুকলিকৈ ক্ষোভ উজাৰিবলৈ গৈ জন প্ৰতিনিধিসকলৰ প্ৰতি কটু আৰু অশোভনীয় মন্তব্য কৰাৰ সমান্তৰালভাৱে চৰকাৰৰ সমৰ্থকেও চৰকাৰক সমালোচনা কৰা লেখক-বুদ্ধিজীৱী, নেতৃস্থানীয় ব্যক্তি ইত্যাদিৰ বিৰুদ্ধে একেই অশালীন মন্তব্য কৰা পৰিলক্ষিত হৈছে।

অলপতে এটা নাবালক কিশোৰে মুখ্য মন্ত্ৰী, বিত্ত মন্ত্ৰী, আৰু প্ৰধান মন্ত্ৰীক অশোভনীয় ভাষাৰে সমালোচনা কৰি য়ু টিউবত ভিডিঅ’ আপল’ড কৰাৰ পিছত নাবালক কিশোৰজন আৰক্ষীৰ জালত পৰিব লগীয়া হৈছিল। কিশোৰজনৰ বিৰুদ্ধে মাজুলীৰ এজন বিজেপিৰ পালিনেতাই আৰক্ষী থানাত এজাহাৰ দিছিল।

অনুৰূপ ঘটনা ঘটিছে আজি আন এগৰাকী ছ’চিয়েল মিডিয়া ব্যৱহাৰ কৰা যুৱতীৰ ক্ষেত্ৰত। জানিব পৰামতে, প্ৰিয়ংকা কলিতা নামৰ এটা ফেইচবুক একাউণ্টৰ পৰা ২৬ মে’ৰ দিনা একাউণ্টটোৰ গৰাকীয়ে নিজৰ টাইমলাইনত বিজেপিৰ বিধায়িকা আঙুৰলতা ডেকাক উদ্দেশ্যি অশালীন-অশোভনীয় মন্তব্যৰে পোষ্ট দিছিল।

এই সন্দৰ্ভত নগাঁও সদৰ আৰক্ষী থানাত যুৱতীগৰাকীৰ বিৰুদ্ধে এখন এজাহাৰ দাখিল কৰিছে নগাঁৱৰ চকলাঘাট বামুণগাঁ‌ৱঁৰ লোকেন্দ্ৰ নাথ নামৰ ব্যক্তি এগৰাকীয়ে। এজাহাৰ দিওঁতা লোকেন্দ্ৰ নাথে যুৱতীগৰাকীক অনতিপলমে কৰায়ত্ত কৰি উপযুক্ত শাস্তি প্ৰদানৰ দাবী জনাইছে। নাথে এজাহাৰখনত পোষ্টটোৰ জৰিয়তে যুৱতীগৰাকীয়ে চূড়ান্ত অপমানসূচক শব্দ প্ৰয়োগ কৰাৰ লগতে বিধায়িকাগৰাকীৰ চৰিত্ৰতো আঘাত হনা বুলি অভিযোগ কৰিছে। এই পোষ্টটোৱে সমাজত বিধায়িকা গৰাকীৰ ভাবমূৰ্তি ম্লান কৰা বুলি তেওঁ দাবী কৰিছে।

আনহাতে, এই নামৰ এগৰাকী যুৱতীয়ে আজি নিজৰ টাইমলাইনত তেওঁৰ নামত এই পোষ্টটো কোনোবা দুষ্ট লোকে প্ৰচাৰ কৰা বুলি অভিযোগ কৰিছে। তেওঁ এই কাম হিন্দু বাংলাদেশীৰ সমৰ্থক অথবা ভক্ত (বিজেপিৰ  অন্ধ সমৰ্থক)ৰ হ’ব পাৰে বুলি নিজৰ পোষ্টটোৰ জৰিয়তে মত দিছে। তেওঁ তেওঁৰ একাউণ্টটো হেকড হোৱাৰো সন্দেহ প্ৰকাশ কৰিছে।