এন আই টি আগৰতলাত ভয়ংকৰ ৰেগিং : বহিষ্কৃত উত্তৰ প্ৰদেশৰ ছাত্ৰ

ত্ৰিপুৰাৰ এন আই টি আগৰতলাত দেওবাৰে সংঘটিত ৰেগিঙৰ ঘটনাত জড়িত থকাৰ বাবে এন আই টিখনৰ চিৱিল ইঞ্জিনিয়াৰিং বিভাগৰ চূড়ান্ত বৰ্ষৰ ৰিতুৰাজ তিৱাৰি নামৰ উত্তৰ প্ৰদেশ বাৰাণসীৰ ছাত্ৰজনক বহিষ্কাৰ কৰা হৈছে।

ঘটনাৰ তদন্তৰ বাবে শিক্ষানুষ্ঠান কৰ্তৃপক্ষই এক তদন্ত সমিতিও গঠন কৰিছে বুলিও জানিব পৰা গৈছে।

এন আই টিৰ ডীনজনে ঘটনাটো সন্দৰ্ভত এজাহাৰ দাখিল নকৰিবলৈ বুলি অৰুণাচল প্ৰদেশৰ ছাত্ৰজনৰ অভিভাৱকক খাতিৰ কৰা বুলি তেওঁলোকে পূৰ্বে অভিযোগ কৰিছিল।

কিন্তু এন আই টিৰ কিছু ছাত্ৰ-ছাত্ৰীয়ে কালি মঙলবাৰে নিগৃ্হীত ছাত্ৰজনৰ হৈ মাত মতাৰ পিছতে কৰ্তৃপক্ষই এই তদন্ত ঘোষণা কৰে বুলি জানিব পৰা গৈছে। আনহাতে কেন্দ্ৰীয় গৃ্হ ৰাজ্য মন্ত্ৰী তথা অৰুণাচলৰ সাংসদ কিৰেন ৰিজিজুৱেও ঘটনাটোক দুৰ্ভাগ্যজনক বুলি অভিহিত কৰি দোষীক শাস্তি দিয়াৰ বাবে ত্ৰিপুৰাৰ মুখ্য মন্ত্ৰীক অনুৰোধ জনাইছিল।

দেহৰ বিভিন্ন অংশত হাড়ৰ জোৰা লৰা আৰু কাণৰ ভিতৰতো আঘাত পোৱা নিপীড়িত অৰুণাচল প্ৰদেশৰ ছাত্ৰজন বৰ্তমান গুৱাহাটীৰ এখন চিকিৎসালয়ত ভৰ্তি হৈ আছে।

উল্লেখযোগ্য যে চিভিল ইঞ্জিনিয়াৰিং বিভাগৰ ছাত্ৰ ডুই ডোজিক যোৱা দেওবাৰে জ্যেষ্ঠ ছাত্ৰৰ এটা দলে ৰেগিং কৰিছিল।